തെരുവു നായ കടിച്ച പൂച്ചക്ക് ശസ്ത്രക്രിയയിലൂടെ പുനര്‍ജന്മം

അമ്പലപ്പുഴ: തെരുവു നായ കടിച്ച പൂച്ചക്ക് അടിയന്തര ശസ്ത്രക്രിയയിലൂടെ ജീവന്‍ തിരികെ ലഭിച്ചു. ആമയിട മണിമന്ദിരത്തില്‍ അനില്‍ കുമാറിന്റെ ബോസ്‌ക്കോ എന്ന പൂച്ചയുടെ ജീവനാണ് വീട്ടുകാരുടെ ഇടപെടല്‍ മൂലം തിരികെ ലഭിച്ചത്. ഇന്നലെ വൈകിട്ട് 4.30 ഓടെയാണ് വീട്ടില്‍ വെച്ച് പൂച്ചയെ തെരുവു നായ കടിച്ചത്.കടിയേറ്റ പൂച്ചയുടെ ചെറുകുടലും വന്‍ കുടലും പുറത്തു വന്ന് ഗുരുതരാവസ്ഥലായി. ഉടന്‍ തന്നെ അമ്പലപ്പുഴയിലെ മൃഗാശുപത്രിയിലെത്തിച്ചെങ്കിലും ശസ്ത്രക്രിയക്കുള്ള സംവിധാനം ഇവിടില്ലെന്ന് ഡോക്ടര്‍ അറിയിച്ചതോടെ പൂച്ചയെ ആലപ്പുഴ മുല്ലക്കലുള്ള മൃഗാശുപത്രിയിലെത്തിച്ചു.  

ഇവിടെ പൂച്ചയെ അനസ്‌തേഷ്യ നല്‍കിയ ശേഷം 45 മിനിറ്റു നീണ്ടു നിന്ന ശസ്ത്രക്രിയയിലൂടെ ജീവന്‍ തിരികെ ലഭിച്ചു.മൂന്നു ഡോക്ടര്‍മാരുടെ നേതൃത്വത്തിലാണ് ശസ്ത്രക്രിയ നടത്തിയത്.ഇതിനു ശേഷം തിരികെ വീട്ടിലെത്തിച്ച പൂച്ച സുഖം പ്രാപിച്ചു വരുന്നതായി അനില്‍ കുമാര്‍ പറഞ്ഞു.പത്ര വിതരണക്കാരന്‍ കൂടിയായ അനില്‍ കുമാര്‍ 10 ആടുകള്‍, 12 പ്രാവുകള്‍, രണ്ടു നായ്‌ക്കള്‍, പശു എന്നിവയേയും വളര്‍ത്തുന്നുണ്ട്.