തിരുവനന്തപുരം : എല്ഡിഎഫിന്റെ അടിത്തറ വിപുലീകരിക്കേണ്ടത് ജനാധിപത്യ ശക്തികളെ ആകര്ഷിച്ചു കൊണ്ടാണ്. അതല്ലാതെ വരികയും പോവുകയും ചെയ്യുന്നവരെ സ്വീകരിച്ചു കൊണ്ടല്ലെന്ന് സിപിഐ സംസ്ഥആന സെക്രട്ടറി കാനം രാജേന്ദ്രന്. തുടര് ഭരണ സാധ്യതയെ ദുര്ബലപ്പെടുത്തുന്ന നിലപാടുകള് എടുക്കാന് പാടില്ലെന്നും കാനം അറിയിച്ചു.
ജോസ് കെ. മാണി സ്വാധീനമുള്ള കക്ഷിയാണെന്ന് ദേശാഭിമാനി പത്രത്തിലൂടെയായിരുന്നു കോടിയേരി പ്രസ്താവന നടത്തിയത്. എല്ഡിഎഫ് കണ്വീനര് എ. വിജയരാഘവനും ഇതിനെ അനുകൂലിച്ച് രംഗത്ത് എത്തിയിരുന്നു. ഇടത് മുന്നണി പ്രവേശനം സംബന്ധിച്ച് ജോസ് കെ. മാണി വ്യക്തമാക്കിയാല് യോഗം ചേര്ന്ന് ഐക്യത്തോടെ വിഷയത്തില് തീരുമാനമെടുക്കുമെന്നും എ. രാഘവനും പ്രസ്താവന നടത്തിയിരുന്നു.
എന്നാല് ജോസ് കെ. മാണിയുടെ ഇടത് മുന്നണി പ്രവേശനം സംബന്ധിച്ച് സിപിഐക്ക് എതിര്പ്പ് നേരത്തെ നിലനിന്നിരുന്നു. കാനം വിഷയത്തില് ഇപ്പോഴാണ് പ്രതികരിക്കുന്നത്. 1965ലെ ചരിത്രം കോടിയേരി ഒന്നു കൂടി വായിക്കണം. സംസ്ഥാനത്തിന്റെ തുടര്ഭരണ സാധ്യത ഇല്ലാതാക്കുന്ന തീരുമാനങ്ങള് കൈക്കൊള്ളരുതെന്നും കാനം അറിയിച്ചു.
1965ല് ഒറ്റക്കല്ല മത്സരിച്ചത്. കോടിയേരി ആ ചരിത്രം ഒന്നു കൂടി വായിച്ചു നോക്കുന്നത് നല്ലതാണ്. 65ല് മുസ്ലിം ലീഗ് ഉള്പ്പെടെയുള്ള കക്ഷികളുമായി ധാരണയുണ്ടാക്കിയാണ് സിപിഎം മത്സരിച്ചത്. ഒറ്റക്ക് മത്സരിച്ചു എന്ന് പറയുന്നതില് എന്താണര്ഥം. എല്ഡിഎഫിന്റെ അടിത്തറ വിപുലീകരിക്കേണ്ടത് ജനാധിപത്യ ശക്തികളെ എല്ഡിഎഫിലേക്ക് ആകര്ഷിച്ചു കൊണ്ടാണ്. അതല്ലാതെ വരികയും പോവുകയും ചെയ്യുന്നവരെ സ്വീകരിച്ചു കൊണ്ടല്ലെന്നും അദ്ദേഹം വിമര്ശിച്ചു.
50,000 വോട്ടര്മാരെ കാണാതെ മുഴുവന് വോട്ടര്മാരുടെ കയ്യില് നിന്ന് വിവരങ്ങള് അറിയാനുള്ള സംവിധാനം ഇടതുപക്ഷ ജനാധിപത്യമുന്നണിക്കുണ്ട്. ഗ്രാസ്സ് റൂട്ട് ലെവലില് നിന്നുള്ള റിപ്പോര്ട്ട് തുടര് ഭരണമുണ്ടാകുമെന്നാണ് പറയുന്നത്. തെരഞ്ഞെടുപ്പ് അടുത്തിരിക്കുന്ന സാഹചര്യത്തില് ഇതിനെ ദുര്ബലപ്പെടുത്താനുള്ള രാഷ്ട്രീയം തീരുമാനം എടുക്കാന് പാടില്ല. സര്വ്വേയുടെ അടിസ്ഥാനത്തിലല്ല ഇടതുപക്ഷ പാര്ട്ടികള് പ്രവര്ത്തിക്കുന്നത്.
മുന്നണി എന്നത് കക്ഷികളുടെ നിലപാടിന്റെ അടിസ്ഥാനത്തിലുള്ളതാണ്. ജോസ് കെ മാണി യുഡിഎഫ് വിട്ടിട്ടില്ല. മൂന്ന് മുന്നണിയുമായി സഹകരിക്കുകയാണ് അവര്. വീരേന്ദ്രകുമാറിന്റെ ജനതാദള് പാര്ട്ടി എല്ഡിഎഫിലേക്ക് വന്നത് യുഡിഎഫിന്റെ കയ്യില് നിന്ന് അവര്ക്ക് ലഭിച്ച സര്വ്വതും രാജ്യസഭാംഗവും വിട്ടെറിഞ്ഞിട്ടാണ്. ജോസ് കെ. മാണി വിഭാഗത്തിന്റെ പല എംപിമാരും നിലവില് യുപിഎയുടെ എംപിമാരാണ്. അതൊക്കെ അവര് ഉപേക്ഷിക്കട്ടെ എന്നിട്ടാവാം മുന്നണി പ്രവേശനത്തെ കുറിച്ച് ആലോചിക്കുന്നത്. വിഷയത്തില് സിപിഐക്ക് ധൃതിയില്ലെന്നും ഇപ്പോള് സാമൂഹിക അകലം പാലിക്കേണ്ട സമയമാണിതെന്നും കാനം കൂട്ടിച്ചേര്ത്തു.
