പോത്തന്‍കോട്: പന്തലക്കോട് കഴിഞ്ഞ ദിവസങ്ങളില്‍ സിപിഎം പ്രവര്‍ത്തകര്‍ നടത്തിയ അക്രമരാഷ്‌ട്രീയത്തില്‍ നിന്നും സ്വയരക്ഷതേടി വെമ്പായം പഞ്ചായത്തിലെ മൊട്ടമൂട്, കുറ്റിയാണി പ്രദേശങ്ങളില്‍ നിന്നും സിപിഎം അംഗങ്ങള്‍ ഉള്‍പ്പെടെ 72 കുടുംബങ്ങള്‍ ബിജെപിയില്‍ ചേര്‍ന്നു.
പന്തലക്കോട് അടുത്ത ദിവസങ്ങളിലായി 49 ഓളം കുടുംബങ്ങള്‍ ബിജെപിയില്‍ ചേര്‍ന്നിരുന്നു. ഇതില്‍ വിരളിപൂണ്ട സിപിഎം നേതൃത്വത്തിന്റെ അറിവോടെയാണ് മണ്ഡല്‍ കാര്യവാഹ് രാകേഷിന്റെ വീട്ടില്‍ റീത്ത് വച്ച് വധഭീഷണി ഉയര്‍ത്തിയതെന്ന് ബിജെപി ആരോപിച്ചു. ഇതിനു പിന്നാലെയാണ് കഴിഞ്ഞ ദിവസം 72 കുടുംബങ്ങള്‍ രണ്ടിടങ്ങളില്‍ നിന്നുമായി ബിജെപിയില്‍ അണിനിരന്നത്.
ബിജെപി ജില്ലാ അധ്യക്ഷന്‍ വി.വി. രാജേഷ് പ്രവര്‍ത്തകര്‍ക്ക് അംഗത്വം നല്‍കി സ്വീകരിച്ചു. ബിജെപി മേഖലാ സെക്രട്ടറി കല്ലയം വിജയകുമാര്‍, ജില്ലാ സെക്രട്ടറി എം. ബാലമുരളി, മണ്ഡലം പ്രസിഡന്റ് വിജയകുമാര്‍, ബിജെപി നേതാക്കളായ മുരളികൃഷ്ണന്‍, ഉദയകുമാര്‍, പട്ടത്താനം സുരേഷ്, സ്വപ്‌ന സുദര്‍ശന്‍, ബി.എസ്. പ്രസാദ്, ഗിരിജകുമാരി, പാപ്പനംകോട് നന്ദു, പള്ളിപ്പുറം വിനോദ്, സജി, ശ്യാംകൃഷ്ണ തുടങ്ങിയവര്‍ പങ്കെടുത്തു.
പ്രതികരിക്കാൻ ഇവിടെ എഴുതുക: