മുട്ടം: പൂച്ചകുഞ്ഞിനെ അകത്താക്കുന്നതിനിടെ പെരുമ്പാമ്പിനെ പിടികൂടി. മലങ്കരയിലെ അയ്യംപാറ വള്ളിയാനപ്പുറം പി.കെ. ബിനോജിന്റെ വീട്ടിലെ കുളിമുറിയില്‍ നിന്ന് ഇന്നലെ പുലര്‍ച്ചെ 2ന് ആണ് പാമ്പിനെ പിടികൂടിയത്.
പൂച്ചക്കുട്ടികള്‍ കരയുന്ന ശബ്ദം കേട്ട് ബിനോജും വീട്ടുകാരും വീടിന്റെ കുളിമുറിയില്‍ ചെന്ന് നോക്കിയപ്പോഴാണ് പെരുമ്പാമ്പ് ഒരു പൂച്ചക്കുഞ്ഞിനെ വിഴുങ്ങിയും തള്ള പൂച്ചയെ വരിഞ്ഞു മുറുക്കിയ നിലയിലും കണ്ടത്. ഉടന്‍ വീട്ടുകാര്‍ വടി ഉപയോഗിച്ച് പാമ്പിനെ ചാക്കിലാക്കി.
പിന്നീട് വനം വകുപ്പ് അധികൃതര്‍ക്ക് കൈമാറി. പെരുമ്പാമ്പില്‍ നിന്ന് രക്ഷപെടുത്തിയെങ്കിലും തള്ള പൂച്ച ചത്തു. മറ്റ് മൂന്ന് പൂച്ചകുഞ്ഞുങ്ങള്‍ അടുത്ത് കിടന്നിരുന്നെങ്കിലും പെരുമ്പാമ്പിന്റെ വലയില്‍ പെട്ടില്ല. കഴിഞ്ഞ ദിവസം ഇടവെട്ടി മേഖലയില്‍ നിന്നും പെരുമ്പാമ്പിനെ നാട്ടുകാര്‍ പിടികൂടിയിരുന്നു.
പ്രതികരിക്കാൻ ഇവിടെ എഴുതുക: