കൊച്ചി: ജില്ലയില്‍ ഇന്നലെ ഏഴുപേര്‍ക്ക് കൂടി കൊറോണ വൈറസ് ബാധ സ്ഥിരീകരിച്ചു, ഒരാള്‍ രോഗമുക്തി നേടി. 15ന് കുവൈറ്റ്- കൊച്ചി വിമാനത്തിലെത്തിയ 36 വയസുള്ള ചൂര്‍ണിക്കര സ്വദേശി, 14ന് കുവൈറ്റ്-കൊച്ചി വിമാനത്തിലെത്തിയ 40 വയസുള്ള ആലങ്ങാട് സ്വദേശി, 18ന് ഖത്തര്‍-കൊച്ചി വിമാനത്തിലെത്തിയ 46 വയസുള്ള കാഞ്ഞൂര്‍ സ്വദേശി, 14ന് കുവൈറ്റ്-കൊച്ചി വിമാനത്തിലെത്തിയ 33 വയസുള്ള മഞ്ഞപ്ര സ്വദേശി, 18ന് റോഡ് മാര്‍ഗം ചെന്നൈയില്‍ നിന്നെത്തിയ 48 വയസുള്ള മട്ടാഞ്ചേരി സ്വദേശി, ട്രയിനില്‍ മുംബൈയില്‍ നിന്ന് 22ന് കൊച്ചിയിലെത്തിയ 29 വയസുള്ള ഫോര്‍ട്ട് കൊച്ചി സ്വദേശി, 13ന് വിമാനത്തില്‍ ചെന്നൈയില്‍ നിന്ന് കൊച്ചിയിലെത്തിയ 27 വയസുള്ള ആലങ്ങാട് സ്വദേശിനി എന്നിവര്‍ക്കാണ് രോഗം സ്ഥിരീകരിച്ചത്. 14ന് രോഗം സ്ഥിരീകരിച്ച 28 വയസുള്ള കോട്ടയം സ്വദേശിയാണ് രോഗമുക്തി നേടിയത്.
ഐഎന്‍എച്ച്എസ് സഞ്ജീവനിയില്‍ ചികിത്സയിലുണ്ടായിരുന്ന ഒരാളെ ഇന്നലെ ഡിസ്ചാര്‍ജ് ചെയ്തു. ഇന്നലെ 1061 പേരെ കൂടി ജില്ലയില്‍ പുതുതായി വീടുകളില്‍ നിരീക്ഷണത്തിലാക്കി. നിരീക്ഷണ കാലയളവ് അവസാനിച്ച 783 പേരെ നിരീക്ഷണ പട്ടികയില്‍ നിന്ന് ഒഴിവാക്കുകയും ചെയ്തു. ഇതോടെ നിരീക്ഷണത്തില്‍ ഉള്ളവരുടെ ആകെ എണ്ണം 13651 ആയി. ഇതില്‍ 11895 പേര്‍ വീടുകളിലും, 584 പേര്‍ കൊറോണ കെയര്‍ സെന്ററുകളിലും 1172 പേര്‍ പണം കൊടുത്തുപയോഗിക്കാവുന്ന സ്ഥാപനങ്ങളിലുമാണ്.
ഇന്നലെ 14 പേരെ പുതുതായി ആശുപത്രിയില്‍ നിരീക്ഷണത്തിനായി പ്രവേശിപ്പിച്ചു. ജില്ലയില്‍ വിവിധ ആശുപത്രികളില്‍ നിരീക്ഷണത്തിലുള്ളവര്‍ 215ഉം രോഗം സ്ഥിരീകരിച്ച് ചികിത്സയില്‍ കഴിയുന്നത് 173 പേരുമാണ്. ഇന്നലെ 198 സാമ്പിളുകള്‍ കൂടി പരിശോധനയ്‌ക്ക് അയച്ചു. 229 പരിശോധന ഫലങ്ങള്‍ ലഭിച്ചു. ഇനി 304 ഫലങ്ങള്‍ ലഭിക്കാനുണ്ട്.
പ്രതികരിക്കാൻ ഇവിടെ എഴുതുക: