രാജപുരം: ബളാല്‍ ഗ്രാമ പഞ്ചായത്തിലെ ഒന്നാംവാര്‍ഡില്‍ ഉള്‍പ്പെടുന്ന കുറുമാണം കോളനിയില്‍ കേരള വനവാസി വികാസ കേന്ദ്രം നടത്തുന്ന ഗ്രാമീണ പഠനകേന്ദ്രത്തിലെ 20 ഓളം വിദ്യാര്‍ത്ഥികള്‍ക്ക് എബിവിപി കാസര്‍കോട് ജില്ലാ കമ്മറ്റിപഠനസൗകര്യമൊരുക്കി. ടെലിവിഷനും പഠനോപകരണങ്ങളും എബിവിപി സംസ്ഥാന ജോയിന്റ് സെക്രട്ടറി ശ്രീഹരി രാജപുരം വിതരണം ചെയ്തു.
ജില്ലയിലെ എല്ലാ വിദ്യാര്‍ത്ഥികള്‍ക്കും ആവശ്യമായ സൗകര്യമൊരുക്കിയെന്ന് സര്‍ക്കാര്‍ അവകാശപ്പെടുമ്പോഴും ഇന്നും നിരവധി വിദ്യാര്‍ത്ഥികളാണ് ഓണ്‍ ലൈന്‍ പഠന സൗകര്യങ്ങളില്ലാതെ ബുദ്ധിമുട്ടുന്നുണ്ട്. ജില്ലയിലെ വീടുകളും പഠനകേന്ദ്രങ്ങളും ഉള്‍പ്പെടെ അമ്പതോളം സ്ഥലങ്ങളില്‍ പഠന സൗകര്യത്തിനാവിശ്യമായ ടെലിവിഷനും മറ്റ് പഠനോപകരണങ്ങളും എബിവിപി വിതരണം ചെയ്തു.
ഇനിയും സൗകര്യങ്ങളില്ലാത്ത വിദ്യാര്‍ത്ഥികള്‍ക്ക് എത്രയും പെട്ടെന്ന് സൗകര്യമൊരുക്കണമെന്ന് എബിവിപി ആവശ്യപ്പെട്ടു. ജില്ലാ പ്രസിഡണ്ട് വൈശാഖ് കൊട്ടോടി, വനവാസി വികാസ കേന്ദ്രം ജില്ലാ സംഘടനാ സെക്രട്ടറി ഷിബു പാണത്തൂര്‍, രാജപുരംനഗര്‍ കണ്‍വീനര്‍ ജീഷ്ണുകളളാര്‍, ജീഷ്ണുപ്രസാദ് മുണ്ടമാണി, അഖില്‍ അയ്യങ്കാവ് എന്നിവര്‍ പങ്കെടുത്തു.
പ്രതികരിക്കാൻ ഇവിടെ എഴുതുക: