പോത്തന്‍കോട്: ഓണ്‍ലൈന്‍ പഠനം വിദൂര സ്വപ്‌നമായി കണ്ട അളഹയ്ക്കും ആര്യനും പഠന സഹായത്തിന് കൈത്താങ്ങായ് യുവമോര്‍ച്ച. യുവമോര്‍ച്ച മങ്ങാട്ടുകോണം യൂണിറ്റിന്റെ നേതൃത്വത്തിലാണ് എട്ടാം ക്ലാസ് വിദ്യാര്‍ഥി അളഹയ്ക്കും മൂന്നാം ക്ലാസ് വിദ്യാര്‍ഥി ആര്യനും ഓണ്‍ലൈന്‍ പഠനത്തിനായി ടിവി വാങ്ങി നല്‍കിയത്.
കാട്ടായിക്കോണം മൂഴിനടയില്‍ പ്രസാദ്-സുനിത ദമ്പതികളുടെ മക്കളാണ് ഇരുവരും. കയറ്റിറക്ക് തൊഴിലാളിയായ പ്രസാദ് ആറ് മാസം മുമ്പ് മരണപ്പെട്ടു. തുടര്‍ന്ന് സുനിതയുടെ കുടുംബം കടുത്ത പ്രതിസന്ധിയായിരുന്നു. സുനിയുടെ തയ്യല്‍തൊഴിലില്‍ നിന്നും ലഭിച്ച തുശ്ചമായ വരുമാനത്തിലാണ് കുടുംബത്തിന്റെ ഉപജീവനം. കുടുംബത്തിന്റെ ദുരവസ്ഥ അറിഞ്ഞ യുവമോര്‍ച്ച പ്രവര്‍ത്തകര്‍ സഹായഹസ്തവുമായി മുന്നോട്ടുവരികയായിരുന്നു.
ബിജെപി സംസ്ഥാന ജനറല്‍ സെക്രട്ടറി അഡ്വ. പി. സുധീര്‍ സുനിതയുടെ വീട്ടിലെത്തി വിദ്യാര്‍ഥികള്‍ക്ക് ടി വി കൈമാറി. ബിജെപി ഏര്യാ പ്രസിഡന്റ് വിജയകുമാര്‍, യുവമോര്‍ച്ച മണ്ഡലം പ്രസിഡന്റ് ജയദേവ്, വൈസ് പ്രസിഡന്റ് നിതിന്‍ തുടങ്ങിയവര്‍ പങ്കെടുത്തു.
പ്രതികരിക്കാൻ ഇവിടെ എഴുതുക: