വുഹാനിലേതു പോലെ ഷിന്‍ഫാദിലും വൈറസ് വ്യാപന കണക്കുകള്‍ മറയ്‌ക്കുന്നു; രണ്ടാം വൈറസ് വ്യാപനത്തിലും കള്ളം പറഞ്ഞ് ചൈന

വാഷിങ്ടണ്‍: കൊറോണ വൈറസിന്റെ രണ്ടാം വരവിലും ചൈന കള്ളം പറയുന്നുവെന്ന് അന്താരാഷ്‌ട്ര സമൂഹം. ഷിന്‍ഫാദി ഭക്ഷ്യ മാര്‍ക്കറ്റുമായി ബന്ധപ്പെട്ട ക്ലസ്റ്ററില്‍ വെറും ഏഴു ദിവസത്തിനിടെ 180 പേര്‍ക്ക് കൊറോണ കണ്ടെത്തിയതായാണ് ചൈനയുടെ വാദം. എന്നാല്‍, ഇവിടെ വൈറസ് വ്യാപനം ഒരു മാസം മുന്‍പ് തന്നെ തുടങ്ങിയിരിക്കാമെന്ന് ചൈനയുടെ സെന്റര്‍ ഫോര്‍ ഡിസീസ് കണ്‍ട്രോള്‍ ആന്‍ഡ് പ്രിവന്‍ഷന്‍ വ്യക്തമാക്കിയിരുന്നു. ചൈന വിവരങ്ങള്‍ മറച്ചുവച്ചുവോ എന്നതിലേക്കാണ് ഇതും വിരല്‍ ചൂണ്ടുന്നതെന്ന് അന്താരാഷ്‌ട്ര സമൂഹം ആരോപിക്കുന്നു.

കൊറോണയുമായി ബന്ധപ്പെട്ട് പുറത്ത് വിടുന്ന കണക്കുകളില്‍ ചൈന കൂടുതല്‍ സുതാര്യമാകണമെന്ന് യുഎസ് സ്റ്റേറ്റ് സെക്രട്ടറി മൈക് പോംപിയോ, ഹവായ്‌യില്‍ മുതിര്‍ന്ന ചൈനീസ് ഉദ്യോഗസ്ഥന്‍ യാങ് ജിയേച്ചിയുമായി നടത്തിയ ചര്‍ച്ചയ്‌ക്കിടെ പറഞ്ഞു. വുഹാനിലേതു പോലെ വൈറസ് വ്യാപനത്തിന്റെ കണക്കുകള്‍ ഷിന്‍ഫാദിയിലും ചൈന മറച്ചു വയ്‌ക്കരുതെന്ന് അമേരിക്കയുടെ കിഴക്കന്‍ ഏഷ്യന്‍ നയതന്ത്രജ്ഞന്‍ ഡേവിഡ് സ്റ്റില്‍വെല്‍ പറഞ്ഞു.

ഒരിക്കല്‍ ലോകത്തിന് മുന്നില്‍ നഷ്ടപ്പെട്ട വിശ്വാസ്യത വീണ്ടെടുക്കണമെങ്കില്‍ ചൈന തന്നെ വിചാരിക്കണം. അതിന് വൈറസ് വ്യാപനവുമായി ബന്ധപ്പെട്ട കൃത്യമായ വിവരങ്ങള്‍ മറ്റുള്ളവര്‍ക്ക് നേരിട്ട് ലഭ്യമാക്കാനുള്ള സാഹചര്യം ചൈന ഒരുക്കണമെന്നും അദ്ദേഹം പറഞ്ഞു.

കൊറോണ എങ്ങനെ ഉത്ഭവിച്ചെന്നും മനുഷ്യരിലെത്തിയെന്നും എപ്പോള്‍ വ്യാപനം ആരംഭിച്ചെന്നും എത്ര പേര്‍ ചൈനയില്‍ മരിച്ചെന്നുമടക്കം നിരവധി ചോദ്യങ്ങള്‍ ചൈനയ്‌ക്കെതിരെ ആദ്യ ഘട്ടത്തിലും ഉയര്‍ന്നിരുന്നു. ഈ ആരോപണങ്ങള്‍ക്ക് ഇപ്പോഴും ചൈനയ്‌ക്ക് കൃത്യമായ മറുപടി ഇല്ലെന്നിരിക്കെയാണ് ഷിന്‍ഫാദി മാര്‍ക്കറ്റുമായി ബന്ധപ്പെട്ട വ്യാപനത്തിലും സംശയങ്ങള്‍ ഉടലെടുത്തിരിക്കുന്നത്.

മരണം 4.56 ലക്ഷം

കൊറോണ വൈറസ് ബാധിച്ച് ലോകത്ത് ഇതുവരെ ജീവന്‍ നഷ്ടപ്പെട്ടവരുടെ എണ്ണം 4.56 ലക്ഷം കടന്നു. ഇന്നലെ മരിച്ചത് 5123 പേര്‍. 24 മണിക്കൂറിനിടെ വൈറസ് ബാധ സ്ഥിരീകരിച്ചവരുടെ എണ്ണം 1.40 ലക്ഷം. ഇതോടെ ആകെ ബാധിതര്‍ 86.08 ലക്ഷം. 45.5 ലക്ഷം പേര്‍ രോഗമുക്തരായി.

ബ്രസീലില്‍ വൈറസ് ബാധിതര്‍ പത്ത് ലക്ഷത്തിലേക്ക്

ബ്രസീലില്‍ വൈറസ് ബാധിതരുടെ എണ്ണം പത്തു ലക്ഷത്തിലേക്കടുത്തു. 23050 പേര്‍ക്ക് ഇന്നലെയും രോഗം കണ്ടെത്തി. 1204 പേര്‍ കൂടി 24 മണിക്കൂറിനിടെ മരിച്ചു. ആകെ മരണം 47869 ആയി. 5,03507 പേര്‍ ഇതുവരെ കൊറോണ മുക്തരായെങ്കിലും 8318 പേര്‍ ഗുരുതരാവസ്ഥയില്‍.

ഇറാനില്‍ വീണ്ടും വൈറസ്

രണ്ട് മാസത്തിനിടെ ആദ്യമായി ഇറാനില്‍ ഒറ്റദിവസം കൊറോണ ബാധിച്ച് മരിച്ചവരുടെ എണ്ണം നൂറ് കടന്നു. 24 മണിക്കൂറില്‍ മരിച്ചത് 120 പേര്‍. ആരോഗ്യ മന്ത്രാലയമാണ് ഇക്കാര്യം വ്യക്തമാക്കിയത്. ഇതോടെ ആകെ മരണ സംഖ്യ പതിനായിരത്തിനടുത്തെത്തി. ഇറാനില്‍ 2615 പേര്‍ക്ക് ഇന്നലെ മാത്രം രോഗബാധ സ്ഥിരീകരിച്ചു. നിലവില്‍ 31678 പേരാണ് ചികിത്സയിലുള്ളത്. 1.59 ലക്ഷം പേര്‍ ഇതുവരെ രോഗമുക്തി നേടി. കൊറോണ വ്യാപനം ഏറ്റവുമാദ്യം ശക്തമായ രാജ്യങ്ങളിലൊന്നാണ് ഇറാന്‍. നാല് മാസത്തിനിടെ പലവട്ടം ഇവിടെ പുതിയ ക്ലസ്റ്ററുകള്‍ രൂപമെടുത്തു.

സുരക്ഷാ മാനദണ്ഡങ്ങള്‍ പുതുക്കി അമേരിക്കന്‍ സംസ്ഥാനങ്ങള്‍

വൈറസ് വ്യാപനം വീണ്ടും ശക്തി പ്രാപിച്ച അമേരിക്കന്‍ സംസ്ഥാനങ്ങളില്‍ സുരക്ഷാ മാനദണ്ഡങ്ങള്‍ പുതുക്കുന്നു. തുറസ്സായ ഇടങ്ങളില്‍ മാത്രമല്ല എല്ലായിടത്തും മാസ്‌ക് നിര്‍ബന്ധമാക്കി കാലിഫോര്‍ണിയ. നോര്‍ത്ത് കരോലീന, അരിസോണ എന്നിവിടങ്ങളിലും സമാന സുരക്ഷാ മാനദണ്ഡങ്ങള്‍ ശക്തമാക്കാന്‍ സംസ്ഥാന ഭരണകൂടങ്ങള്‍ നിര്‍ദേശം നല്‍കി.

കഴിഞ്ഞ ആഴ്ചയോടെ 23 സംസ്ഥാനങ്ങളിലാണ് വൈറസ് വ്യാപനം രൂക്ഷമായത്. അതേസമയം, ന്യൂയോര്‍ക്ക്, ന്യൂജഴ്‌സി, ഇല്ലിനോയി തുടങ്ങി 18 സംസ്ഥാനങ്ങളില്‍ രോഗവ്യാപനം കുറയുന്നതായും റിപ്പോര്‍ട്ട്. വെര്‍മണ്ട് സംസ്ഥാനത്ത് രോഗവ്യാപനം അമ്പത് ശതമാനം കുറഞ്ഞു. ഇതുവരെ  22.63 ലക്ഷം പേര്‍ക്ക് അമേരിക്കയില്‍ കൊറോണ സ്ഥിരീകരിച്ചു. 1.20 ലക്ഷം മരണങ്ങള്‍ റിപ്പോര്‍ട്ട് ചെയ്തു.