അമ്പിളിയുടെ മരണം: അടുത്തെങ്ങും അര്‍ഹതപ്പെട്ട വീട് ലഭിക്കാനിടയില്ലെന്നറിഞ്ഞതോടെ,​ ഉണ്ടായിരുന്ന ഓട് മേഞ്ഞ വീടും പൊളിച്ചുമാറ്റി

പുല്‍പ്പള്ളി: മുള്ളന്‍കൊല്ലി പഞ്ചായത്തിലെ പാറക്കടവ് മാടപ്പള്ളിക്കുന്നിലെ കമലാലയം അമ്പിളി (45)ആത്മഹത്യ ചെയ്ത് അര്‍ഹതപ്പെട്ട വീട് ലഭിക്കാത്തതിനാലാണെന്ന് ബന്ധുക്കളുടെ പരാതി.  വാര്‍ഡില്‍ പ്ലാസ്റ്റിക് ഷീറ്റ് മേഞ്ഞ കൂരയില്‍ കഴിയുന്ന ഏക കുടുംബം ഇതായിട്ടും പി എംവൈ ഭവനപദ്ധതിയില്‍ ഈ കുടുംബത്തിന്റെ സ്ഥാനം 51 ആണ്. ലൈഫ് ഭവന പദ്ധതിയില്‍ വീട് ലഭിക്കുമെന്ന പ്രതീക്ഷയില്‍ ഉണ്ടായിരുന്നവീട് രണ്ട് വര്‍ഷം മുന്‍പ് പൊളിച്ച് മാറ്റിയാണ് അമ്പിളിയും ഭാര്യയും പറക്കമുറ്റാത്ത 3 മക്കളുമടങ്ങുന്ന കുടുംബം പ്ലാസ്റ്റിക് ഷീറ്റ് മറച്ചുണ്ടാക്കിയ ഷെഡ്ഡിലേക്ക് താമസം മാറ്റിയത്. 

അടുത്തെങ്ങും വീട് ലഭിക്കാനിടയില്ലെന്നറിഞ്ഞതോടെയാണ് കഴിഞ്ഞ ശനിയാഴ്ച നനഞ്ഞൊലിക്കുന്ന ഷെഡ്ഡില്‍ അമ്പിളി തൂങ്ങി മരിച്ചത്. ഓട് മേഞ്ഞ വീടുള്ളവരെ ലൈഫ് പദ്ധതിയില്‍ പെടുത്തില്ലെന്നും പൊളിച്ച് ഷെഡ് കെട്ടി താമസം മാറ്റണമെന്നും ബന്ധപ്പെട്ടവര്‍ പറഞ്ഞതിനാല്‍ ഉണ്ടായിരുന്ന വീടും പൊളിച്ച് മാറ്റിയിരുന്നു. ആശാരിപ്പണിക്കാരനായ അമ്പിളി രോഗിയായതോടെ പണിക്കും പോകാതായി. ഭാര്യ സ്മിത കൂലിപ്പണി ചെയ്താണ് 5 അംഗ കുടുംബത്തെ പോറ്റിയിരുന്നത്. ലൈഫ് പദ്ധതിയില്‍ വീട് കിട്ടാതെ വന്നപ്പോഴാണ് പി എം എ വൈ സ്‌കീമിലേക്ക് പരിഗണിച്ചത്.  

ആവാസ് പ്ലസ്സ് പട്ടികയില്‍ മുന്നിലുണ്ടായിരുന്ന അമ്പിളിയുടെ ഭാര്യ സ്മിതയുടെ പേര് പിന്നീട് പിന്നിലേക്ക് മാറിയെന്നും ഗുണഭേക്താക്കളെ തിരഞ്ഞെടുത്തതില്‍ വ്യാപക ക്രമക്കേട് നടന്നൂവെന്ന് അമ്പിളിയുടെ സഹോദരന്‍ ഉദയന്‍ പരാതിപ്പെട്ടു. ഏക്കര്‍ കണക്കിന് ഭൂമിയും നല്ല വീടും സാമ്പത്തിക ഭദ്രത ഉള്ളവരും പട്ടികയില്‍ ആദ്യം സ്ഥാനം പിടിച്ചപ്പോഴാണ് നിത്യരോഗിയും 10 സെന്റ് സ്ഥലവും മാത്രമുള്ള അമ്പിളിയുടെ കുടുംബം 51 ലെത്തിയത്. ഗ്രാമസഭയില്‍ ഉന്നയിച്ചപ്പോള്‍ വീട് ലഭിക്കുമെന്ന് ഉറപ്പ് ലഭിച്ചിരുന്നു. 

എന്നാല്‍ പഞ്ചായത്ത് ഈ കുടുംബത്തെ വഞ്ചിക്കുകയായിരുന്നുവെന്നും മറ്റ് ഭവന പദ്ധതിയില്‍ ഉള്‍പ്പെടുത്തുകയോ അര്‍ഹമായ വാസയോഗ്യമായ വീട് അനുവദിക്കുകയോ ചെയ്തില്ലെന്നും അമ്പിളിയുടെ ബന്ധുക്കള്‍ പറയുന്നു.   വാര്‍ഡ് വികസന സമിതിയും ഇക്കാര്യത്തില്‍ ഉത്തരവാധികളാണ്. ക്രമക്കേടുള്ള പട്ടിക പിന്‍വലിക്കണമെന്നും മാനദണ്ഡങ്ങള്‍ പാലിച്ച് അര്‍ഹതപ്പെട്ടവരെ കണ്ടെത്തണമെന്നും കളക്ടര്‍ക്കും ഭവന പദ്ധതി നിര്‍വഹണ ഉദ്യോഗസ്ഥര്‍ക്കും കുടുംബം പരാതി നല്‍കും. അമ്പിളിക്ക് അര്‍ഹമായ വീട് നഷ്ടപ്പെടുത്തിയതിന് പരിഹാരമാവശ്യപ്പെട്ട് പഞ്ചായത്ത് ഓഫീസിന് മുന്നില്‍ കുടുംബം നിരാഹാര സത്യാഗ്രഹം നടത്തുമെന്നും ബന്ധുക്കള്‍ അറിയിച്ചു.