തിരുവനന്തപുരം: കൊറോണ പശ്ചാത്തലത്തിൽ തദ്ദേശ സ്വയംഭരണ തിരഞ്ഞെടുപ്പിന്റെ പോളിങ് സമയം നീട്ടണമെന്ന് ശുപാർശ. രാവിലെ ഏഴ് മുതൽ വൈകീട്ട് ആറ് വരെ വോട്ടെടുപ്പ് സമയം നിജപ്പെടുത്തണമെന്നാണ് കമ്മീഷന്റെ ശുപാർശ. ഇതിനായി പഞ്ചായത്തിരാജ് മുനിസിപ്പാലിറ്റി നിയമത്തിൽ ഭേദഗതി വരുത്തണമെന്ന് സർക്കാരിനോട് ആവശ്യപ്പെടുമെന്നും തിരഞ്ഞെടുപ്പ് കമ്മീഷൻ വ്യക്തമാക്കി.
നിലവിൽ രാവിലെ 7 മണിമുതൽ വൈകുന്നേരം അഞ്ച് മണിവരെ 10 മണിക്കൂറാണ് സംസ്ഥാനത്തെ തിരഞ്ഞെടുപ്പ് സമയം. ഇത് ഏഴ് മണിമുതൽ ആറ് മണിവരെ 11 മണിക്കൂറാക്കി നീട്ടണമെന്നാണ് തിരഞ്ഞെടുപ്പ് കമ്മീഷന്റെ ശുപാർശ.
കോവിഡ് ഭീഷണി ജൂൺ, ജൂലൈ വരെ നിലനിൽക്കുമെന്നാണ് പ്രതീക്ഷിക്കുന്നത്. ഭീഷണി തുടരുകയാണെങ്കിൽ കോവിഡ് 19 പ്രോട്ടോക്കോൾ പാലിച്ച് തിരഞ്ഞെടുപ്പ് നടത്തുന്നതിനെക്കുറിച്ച് ആലോചിക്കേണ്ടിവരുമെന്നും തിരഞ്ഞെടുപ്പ് കമ്മീഷൻ വ്യക്തമാക്കി.
നിലവിലെ ഷെഡ്യൂൾ പ്രകാരം ഒക്ടോബർ അവസാനം രണ്ട് ഘട്ടമായി സംസ്ഥാനത്ത് തിരഞ്ഞെടുപ്പ് നടത്താനാണ് കമ്മീഷന്റെ പദ്ധതി. നവംബർ 12ന് മുമ്പ് പുതിയ ഭരണ സമിതികൾ നിലവിൽ വരണം. കോവിഡ് പ്രോട്ടോക്കോൾ പാലിക്കേണ്ടിവന്നാൽ തിരഞ്ഞെടുപ്പ് പ്രചാരണവും അത്തരത്തിൽ നടത്തേണ്ടിവരും. രാഷ്ട്രീയ പാർട്ടികൾ വെർച്വൽ ക്യാംപെയിനുകൾ സംഘടിപ്പിക്കേണ്ടിവരുമെന്നും കമ്മീഷൻ വ്യക്തമാക്കി.
