വടകര: പരിസ്ഥിതി വാരാചരണത്തോടനുബന്ധിച്ച് തിരുവള്ളൂര് ശാന്തിനികേതന് ഹയര് സെക്കന്ഡറി സ്കൂളില് വിവിധ ക്ലബ്ബുകളുടെ ആഭിമുഖ്യത്തില് നടത്തിയ നാട്ടുമാ മഹോത്സവം ശ്രദ്ധേയമായി. സ്കൂളിലെ മുഴുവന് വിദ്യാര്ത്ഥികളും അവരുടെ വീട്ടുവളപ്പില് പ്ലാവിന് തയ്യോ, മാവിന് തയ്യോ വെച്ച് പിടിപ്പിക്കുന്ന പദ്ധതിയായിരുന്നു ഇത്. കൊറോണ കാലത്ത് നാട്ടാരെ ഊട്ടിയ പ്ലാവിനോടും മാവിനോടുമുള്ള നന്ദി സൂചകമായിട്ടായിരുന്നു പരിപാടി.
സ്കൂള് തല ഉദ്ഘാടനം ജൂണ് അഞ്ചിന് രാവിലെ 10ന് സ്കൂളിനടുത്തുള്ള വിദ്യാര്ത്ഥിയുടെ വീട്ടുവളപ്പില് തൈ നട്ടുകൊണ്ട് ചെയ്തപ്പോള് അതേസമയം വിദ്യാര്ത്ഥികളോട് അവരവരുടെ വീടുകളിലും തൈ നടാന് ആവശ്യപ്പെടുകയായിരുന്നു. അന്ന് നടാന് കഴിയാതിരുന്ന കുട്ടികള് പിന്നീടുള്ള ഒരാഴ്ചക്കാലം കൊണ്ട് അത് പൂര്ത്തിയാക്കി. ഓണ്ലൈന് പഠനകാലം ആയതിനാല് നട്ട തൈകള്ക്ക് സമീപം നിന്ന് ചിത്രമടുത്ത് വിദ്യാര്ത്ഥികള് ക്ലാസ് അധ്യാപകന് അയച്ചുകൊടുത്തു. ഓരോ ക്ലാസിലെ ഓരോ വിദ്യാര്ത്ഥിയുടെ പടം തെരഞ്ഞെടുത്ത് ചിത്രസംയോജനം നടത്തി സ്കൂള്തല കൊളാഷ് രൂപീകരിച്ചു.
ക്ലബ് കോ – ഓര്ഡിനേറ്റര് വടയക്കണ്ടി നാരായണന് മാര്ഗ്ഗനിര്ദ്ദേശം നല്കി. പ്രിന്സിപ്പല് വി.എന്. മുരളീധരന്, പ്രധാനാധ്യാപിക പി. പ്രസന്ന, വിദ്യാര്ഥികളായ റുമാന, മുഹമ്മദ് അഫ്ത്താബ്, മെഹ്ജബിന്, ഫാത്തിമത്തു സാഫിയ, ക്ലാസ് അധ്യാപകര് തുടങ്ങിയവര് നേതൃത്വം നല്കി.
പ്രതികരിക്കാൻ ഇവിടെ എഴുതുക: