ബെര്‍ലിന്‍: ബയേണ്‍ മ്യൂണിക്ക് ജര്‍മന്‍ കപ്പ് ഫുട്ബോള്‍ ചാമ്പ്യന്‍ഷിപ്പിന്റെ ഫൈനലില്‍ കടന്നു. സെമിഫൈനലില്‍ അവര്‍ ഒന്നിനെതിരെ രണ്ട് ഗോളുകള്‍ക്ക് എന്‍ട്രാച്ച് ഫ്രാങ്ക്ഫര്‍ട്ടിനെ പരാജയപ്പെടുത്തി. തുടര്‍ച്ചയായ മൂന്നാം തവണയാണ് ബയേണ്‍ ഫൈനലിലെത്തുന്നത്.
ഇരു പകുതികളിലുമായി റോബര്‍ട്ട് ലെവന്‍ഡോസ്‌കിയും ഇവാന്‍ പെരിസിച്ചുമാണ് ബയേണിനായി ഗോളുകള്‍ നേടിയത്.തുടക്കം മുതല്‍ പൊരുതിക്കളിച്ച ബയേണ്‍ പതിമൂന്നാം മിനിറ്റില്‍ മുന്നിലെത്തി. തോമസ് മുള്ളര്‍ നീട്ടിക്കൊടുത്ത പന്ത് ഇവാന്‍ പെരിസിച്ച് അനായാസം ഫ്രാങ്ക്ഫര്‍ട്ടിന്റെ വലയിലാക്കി.രണ്ടാം പകുതിയില്‍ ഫ്രാങ്ക്ഫര്‍ട്ട് മെച്ചപ്പെട്ട പ്രകടനം കാഴ്ചവച്ചു. അറുപത്തിയൊമ്പതാം മിനിറ്റില്‍ ഡാ കോസ്റ്റ ഗോള്‍ മടക്കി ടീമിന് സമനിലയൊരുക്കി. പക്ഷെ അഞ്ചു മിനിറ്റുകള്‍ക്ക് ശേഷം ലെവന്‍ഡോസ്‌കി നേടിയ ഗോളില്‍ ബയേണ്‍ വിജയം പിടിച്ചെടുത്തു. ബെര്‍ലിനില്‍ അടുത്ത മാസം അഞ്ചിന് നടക്കുന്ന ഫൈനലില്‍ ബയേണ്‍ ബെയര്‍ ലെവര്‍കുസനുമായി ഏറ്റുമുട്ടും. നാലാം ഡിവിഷന്‍ ടീമായ സാര്‍ബ്രൂക്കനെ ഏകപക്ഷീയമായ മൂന്ന് ഗോളുകള്‍ക്ക്് തോല്‍പ്പിച്ചാണ് ലെവര്‍കുസന്‍ ഫൈനലിലെത്തിയത്.
പ്രതികരിക്കാൻ ഇവിടെ എഴുതുക: