പള്ളുരുത്തി: ബന്ധുകൂടിയായ അക്രമിയില്‍ നിന്ന് രക്ഷപ്പെടുത്തണമെന്ന ആവശ്യവുമായി പോലീസിനെ സമീപിച്ചിട്ടും നടപടിയില്ലെന്ന പരാതിയുമായി വൃദ്ധ ദമ്പതികള്‍. കുമ്പളങ്ങി പഴങ്ങാട്ട് പടിയില്‍ പി.വി പൈലിയും ഭാര്യ മേരിയുമാണ് തങ്ങളുടെ ബന്ധുവിന്റെ അക്രമങ്ങളില്‍ നിന്ന് രക്ഷപ്പെടുത്തണമെന്ന ആവശ്യവുമായി പോലീസിനെ സമീപിച്ചത്.
വീട്ടില്‍ വൃദ്ധദമ്പതികള്‍ മാത്രമാണ് താമസിക്കുന്നത്. ഇവരെ മാര്‍ച്ച് 15ന് പഴങ്ങാട്ട് പടിക്കല്‍ ലാസര്‍ എന്നയാള്‍ ആക്രമിച്ചെന്നാണ് പരാതി. സംഭവസമയത്ത് തന്നെ കണ്‍ട്രോള്‍ റൂമിലേക്ക് വിളിച്ചറിയിച്ചതിനെ തുടര്‍ന്ന് പോലീസെത്തിയെങ്കിലും നടപടിയുണ്ടായില്ല. പിറ്റേ ദിവസം പള്ളുരുത്തി പോലീസ് സ്റ്റേഷനില്‍ പരാതി നല്‍കുകയും ചെയ്തു. പരാതി കുമ്പളങ്ങി ഔട്ട് പോസ്റ്റിലേക്ക് കൈമാറിയെന്നാണ് പോലീസ് പറയുന്നത്.
പ്രതി സ്ഥിര മദ്യപാനിയായതിനാല്‍ കേസെടുത്തിട്ട് കാര്യമില്ലെന്നാണ് പോലീസ് നിലപാട്. കേസെടുക്കാന്‍ തയാറാകാതിരിക്കുകയും അക്രമം തുടരുകയും ചെയ്ത സാഹചര്യത്തില്‍ മകള്‍ ജാസ്മിന്‍ പള്ളുരുത്തി പോലീസിന് പരാതി നല്‍കിയെങ്കിലും നടപടികളുണ്ടായില്ല. ജൂണ്‍ നാലിന് ഇയാള്‍ വീണ്ടും വീട് ആക്രമിച്ചു. സംഭവം പോലീസിനെ അറിയിച്ചെങ്കിലും പ്രതിയെ കണ്ടില്ലെന്ന് പറഞ്ഞ് മടങ്ങി പോയി. തുടര്‍ നടപടിക്കുവേണ്ടി മകള്‍ ജാസ്മിന്‍ ഡെപ്യൂട്ടി പോലീസ് കമ്മീഷണര്‍ക്ക് പരാതി നല്‍കി കാത്തിരിക്കുകയാണ്. ദമ്പതികളുടെ രണ്ട് പെണ്‍മക്കളാണുള്ളത്. ഓരാള്‍ വിവാഹിതയും മറ്റൊരാള്‍ കന്യാസ്ത്രീയുമാണ്.
പ്രതികരിക്കാൻ ഇവിടെ എഴുതുക: