അരൂര്: അന്യസംസ്ഥാനത്തു നിന്ന് ചന്തിരൂരിലെ സമുദ്രോല്പന്ന ശാലകളില് എത്തുന്ന ലോറി ജീവനക്കാരെ ക്വാറന്റൈനില് കഴിയുന്നതിനുള്ള സൗകര്യം ഒരുക്കുന്നില്ലെന്ന് വ്യാപാരികള്. സംസ്ഥാനത്ത്് ഏറ്റവും കൂടുതല് സമുദ്രോല്പ്പന ശാലകള് പ്രവര്ത്തിക്കുന്നത് അരൂര് നിയോജക മണ്ഡലത്തിലാണ്. വിവിധ സംസ്ഥാനങ്ങളില് നിന്ന് മത്സ്യവുമായി ഇവിടെ എത്തുന്ന ലോറി തൊഴിലാളികള്ക്ക് ക്വറന്റൈന് സൗകര്യം ഒരുക്കുകയും കമ്പിനി ചെലവില് അവര്ക്കുള്ള ഭക്ഷണം ഒരുക്കുകയും രജിസ്റ്റര് സൂക്ഷിക്കുകയും ചെയ്യണമെന്ന് ആരോഗ്യ വകുപ്പ് നിര്ദ്ദേശിച്ചിരുന്നു. ഇവയെല്ലാം കാറ്റില് പറത്തി അന്യസംസ്ഥാന ലോറി, കണ്ടെയ്നര് തൊഴിലാളികള് യഥേഷ്ടം സാധനങ്ങള് വാങ്ങുന്നതിന് തെരുവിലിറങ്ങുകയാണ്.
ആന്ധ്ര, ഒറീസ, മഹാരാഷ്ട്ര എന്ന വിടങ്ങളില് നിന്ന് വനാമി ചെമ്മീനും വിവിധയിനം മീനുകളുമായി നിരവധി ലോറികള് നിത്യേന ചന്തിരൂരില് എത്തുന്നു. സമുദ്രോല്പ്പന്ന ശാലയുമായി നേരിട്ട് ബന്ധമില്ലത്തവര് വഴിയാണ് വനാമി ചെമ്മീനുകള് എത്തുന്നത്.ലോറികള് വഴി എത്തുന്ന ചെമ്മീന് ഏജന്റുമാര് മുഖേനയാണ് കച്ചവടം നടത്തുന്നത്. ഇങ്ങനെ എത്തുന്ന ലോറികള്ക്ക് കമ്പനികള് യാതൊരു സഹായവും നല്കാത്തതിനാല് ഇവര് ക്വാറന്റൈനില് പോകാതെ സമീപ പ്രദേശങ്ങളില് നിന്ന് സാധനങ്ങള് വാങ്ങാന് എത്തുന്നു. ഇതിനാല് പ്രദേശത്തെ വ്യാപാരികള് ആശങ്കയിലാണ്. സര്ക്കാര് ആരോഗ്യ മേഖലയില് സുരക്ഷ കര്ശനമാക്കി എന്ന് പറയുമ്പോഴും ഇത്തരത്തില് അന്യസംസ്ഥാനത്ത് നിന്ന് ചരക്കുമായി കേരളത്തിലേക്ക് എത്തു ലോറിയിലെ തൊഴിലാളികളെ ശരിയായ സുരക്ഷ പരിശോധനകള് നടത്താന് തയ്യാറാകുന്നില്ല.
ചന്തിരൂര് മേഖലയില് കഴിഞ്ഞ ദിവസം എത്തിയ രണ്ട് പേരെ ആശുപത്രിയില് പ്രവേശിപ്പിച്ചിരുന്നു. ഇതിനെതിരെ വ്യാപാരി വ്യവസായി ഏകോപന സമിതി ചന്തിരൂര് മര്ച്ചന്റ് യൂണിയന് പ്രസിഡന്റ് യു.സി.ഷാജിയും സെക്രട്ടറി ശ്രീധരഷേണായിയും അരൂര് പൊലീസില് പരാതി നല്കി. സമുദ്രോല്പന്ന ശാലകള് കര്ശന നിയന്ത്രണം ഏര്പ്പെടുത്തിയില്ലങ്കില് ശക്തമായ സമരപരിപാടികള് നടത്തുമെന്ന് വ്യാപാരി സംഘടനാ നേതാക്കള് പറഞ്ഞു.
