പത്തനാപുരം: കറവൂരില്‍ പന്നിപ്പടക്കം കടിച്ച് കാട്ടാന ചരിഞ്ഞ സംഭവത്തില്‍ അഞ്ച് പേര്‍ വനപാലകരുടെ പിടിയിലായി. പുന്നല, ഓലപ്പാറ സ്വദേശികളായ പൊടിമോന്‍, സജി, ഗോപി, ശരത് തുടങ്ങിയവരാണ് വനപാലക സംഘത്തിന്റെ പിടിയിലായത്. ഇവരില്‍ നിന്നും നാടന്‍ തോക്ക്, പടക്ക നിര്‍മ്മാണ സാമഗ്രികള്‍ എന്നിവ കണ്ടെടുത്തു. വനമേഖല കേന്ദ്രീകരിച്ച് വന്യമൃഗ വേട്ട നടത്തുന്ന സംഘമാണ് പിടിയിലായിരിക്കുന്നത്.
അമ്പനാര്‍ ഫോറസ്റ്റ് പരിധിയില്‍ ഓലപ്പാറ മാന്തടം ഭാഗത്തെ വനത്തിനുള്ളില്‍ ഏപ്രില്‍ 11നാണ് കാട്ടാനയെ ചരിഞ്ഞ നിലയില്‍ കണ്ടെത്തിയത്. മുപ്പത്തിയഞ്ച് വയസ് പ്രായം വരുന്ന പിടിയാന കറവൂര്‍ കോട്ടക്കയം കാട്ടരുവിക്ക് സമീപം ഏപ്രില്‍ ഒന്‍പതിനാണ് ആദ്യം എത്തിയത്.
വായിലെ വ്രണം മൂലം തീറ്റയും വെള്ളവും കുടിക്കാനാകാത്ത നിലയിലായിരുന്നു. കാട്ടിലേക്ക് ഓടിച്ചുവിടാന്‍ ശ്രമം നടത്തിയെങ്കിലും പോയില്ല. നാട്ടുകാര്‍ വിവരമറിയിച്ചതിനെ തുടര്‍ന്ന് പിറ്റേദിവസം രാവിലെ വനംവകുപ്പ് ഡോക്ടര്‍മാര്‍ സ്ഥലത്ത് എത്തിയെങ്കിലുംചികിത്സ നല്‍കാന്‍ സാധിച്ചിരുന്നില്ല. വീണ്ടും ഒരു ദിവസം കഴിഞ്ഞ് മയക്ക് വെടിവെച്ച് വീഴ്‌ത്താനായി ഡോക്ടര്‍മാര്‍ എത്തിയെങ്കിലും ആനയെ കണ്ടെത്തിയില്ല. തുടര്‍ന്ന് ഏറേ നേരത്തെ തെരച്ചിലിനൊടുവില്‍ ആറ് കിലോമീറ്റര്‍ വനത്തിനുള്ളിലായി പിടിയാനയെ ഗുരുതരാവസ്ഥയില്‍ കണ്ടെത്തിയെങ്കിലും ചികിത്സ തുടങ്ങും മുമ്പേ ആന ചരിയുകയായിരുന്നു.
പാലക്കാട് തിരുവിഴാംകുന്നില്‍ പടക്കം കടിച്ച് ഗര്‍ഭിണിയായ കാട്ടാന ചരിഞ്ഞ സംഭവം വിവാദമായതിന് പിന്നാലെ പത്തനാപുരത്തെ സംഭവത്തില്‍ അന്വേഷണം വഴിമുട്ടിയതും ഏറെ ചര്‍ച്ചയായിരുന്നു.
പ്രതികരിക്കാൻ ഇവിടെ എഴുതുക: