മട്ടാഞ്ചേരി: സംസ്ഥാനത്ത് 52 ദിവസത്തെ ട്രോളിങ് നിരോധനം നാളെ തുടങ്ങും. ഹാര്ബറുകളില് ഇതിനുള്ള ഒരുക്കങ്ങളായി. സംസ്ഥാനത്ത് 4200ഓളം ബോട്ടുകളാണുള്ളത്. മത്സ്യബന്ധനത്തിനായി പോയിരിക്കുന്ന ട്രോള് നെറ്റ്, പേഴ്സിന് ബോട്ടുകള് നാളെ വൈകിട്ടോടെ ഹാര്ബറുകളിലെത്തും. നിരോധന കാലയളവില് പരമ്പരാഗത യാനങ്ങള്ക്ക് സംസ്ഥാന തീരത്ത് മത്സ്യബന്ധനം നടത്താന് അനുവാദമുണ്ട്. ഇതര സംസ്ഥാന ബോട്ടുകള് ഭൂരിഭാഗവും നാട്ടിലേക്ക് മടങ്ങി. ബോട്ടുകളിലെ തൊഴിലാളികള്ക്ക് പുറമേ ഹാര്ബറുകളിലെ ആയിരക്കണക്കിന് അനുബന്ധ തൊഴിലാളികള്ക്കും നിരോധനത്തോടെ ജോലിയില്ലാതാകും.
നിരോധന കാലയളവില് ഹാര്ബറുകളിലെ ഡീസല് ബങ്കുകള്, കായലോര ബങ്കുകള് എന്നിവ അടച്ചിടും. നിരോധന കാലയളവില് മത്സ്യബന്ധനത്തിന് പോകുന്ന പരമ്പരാഗത യാനങ്ങള്ക്ക് ഇന്ധനം നിറയ്ക്കുന്നതിനായി മത്സ്യഫെഡ് ബങ്കുകള്ക്ക് പുറമേ തെരഞ്ഞെടുക്കപ്പെട്ട ബങ്കുകളും പ്രവര്ത്തിക്കും. ഇതിനായി മുനമ്പത്തും വൈപ്പിനിലുമായി രണ്ട് ബങ്കുകള് സജ്ജമാക്കിയിട്ടുണ്ടെന്ന് മറൈന് എന്ഫോഴ്സ്മെന്റ് അധികൃതര് പറഞ്ഞു.
ഇന്ന് ട്രോളിങ് നിരോധനം സംബന്ധിച്ച് ഹാര്ബറുകളില് അറിയിപ്പ് നല്കും. മൂന്ന് ബോട്ടുകള് തീരത്ത് നിരീക്ഷണം നടത്തും. അധികമായി നാല് സീ ഗാര്ഡുകളെ നിയോഗിച്ചിട്ടുണ്ട്. അനുവദിക്കപ്പെട്ട കായലോര ബങ്കുകളില് നിന്ന് യന്ത്രവല്കൃത ബോട്ടുകള്ക്ക് ഡീസല് നല്കാന് പാടില്ല. വൈപ്പിന് ഫിഷറീസ് സ്റ്റേഷനില് 24 മണിക്കൂര് പ്രവര്ത്തിക്കുന്ന കണ്ട്രോള് റൂം സജ്ജീകരിച്ചിട്ടുണ്ട്. ഇതിന് പുറമേ കോസ്റ്റ്ഗാര്ഡ് കപ്പലും ഹെലികോപ്റ്ററും പെട്രോളിങ് നടത്തും. അനുമതിയുള്ള പരമ്പരാഗത മത്സ്യയാനമായ ഇന്ബോര്ഡ് വള്ളത്തിനൊപ്പം ഒരു കാരിയര് വള്ളം മാത്രമേ അനുവദിക്കൂ. കടലില് പോകുന്ന പരമ്പരാഗത മത്സ്യത്തൊഴിലാളികള് നിര്ബന്ധമായും ബയോ മെട്രിക് തിരിച്ചറിയല് കാര്ഡും സുരക്ഷാ ഉപകരണങ്ങളും കരുതണമെന്ന് അധികൃതര് മുന്നറിയിപ്പ് നല്കി.
അതേ സമയം രാജ്യത്ത് ഇന്ന് നടപ്പാക്കുന്ന ട്രോളിങ് നിരോധനം അശാസ്ത്രീയമാണെന്നും വേണ്ടത് സമ്പൂര്ണ നിരോധനമായ ഫിഷിങ് ഹോളിഡേയാണെന്നും ഓള് കേരള ഫിഷിങ് ബോട്ട് ഓണേഴ്സ് അസോസിയേഷന് സംസ്ഥാന സെക്രട്ടറി ജോസഫ് സേവ്യര് കളപ്പുരക്കല് പറഞ്ഞു. ലോക്ഡൗണ് ഇളവുകള്ക്ക് ശേഷം കടലില് പോയ വലിയ വള്ളങ്ങള്ക്ക് ഒരാഴ്ച പന്ത്രണ്ട് ലക്ഷം രൂപ വരെ ലഭിച്ചു. ബോട്ടുകളില് പലതിനും എട്ട് മുതല് പത്ത് ലക്ഷം വരെ വിലമതിക്കുന്ന മത്സ്യം ലഭിച്ചൂവെന്നത് പരിശോധിക്കണമെന്നും അദ്ദേഹം പറഞ്ഞു. നിലവിലെ ട്രോളിങ് നിരോധനം 52 ദിവസത്തില് നിന്ന് തൊണ്ണൂറ് ദിവസമാക്കണമെന്ന് കേരള സ്വതന്ത്ര മത്സ്യത്തൊഴിലാളി ഫെഡറേഷന് സംസ്ഥാന ജനറല് സെക്രട്ടറി വി.ഡി. മജീന്ദ്രന് ആവശ്യപ്പെട്ടു.
ലോക്ഡൗണിനെ തുടര്ന്ന് നാട്ടിലേക്ക് പോയ ഇതര സംസ്ഥാന തൊഴിലാളികള്ക്കും ബോട്ടുകള്ക്കും ട്രോളിങ് നിരോധനത്തിന് ശേഷം മടങ്ങിയെത്താന് കഴിയുമോയെന്ന ആശങ്കയിലാണ് കൊച്ചിയിലെ മത്സ്യമേഖല. ഇവര്ക്ക് പതിനാല് ദിവസം നിരീക്ഷണം ഏര്പ്പെടുത്തി മടങ്ങിയെത്താനുള്ള സൗകര്യം ഒരുക്കണമെന്നാവശ്യപ്പെട്ട് മന്ത്രിക്ക് നിവേദനം നല്കിയിട്ടുണ്ടെന്ന് കൊച്ചിന് ഫിഷറീസ് ഹാര്ബര് കോര്ഡിനേഷന് കമ്മിറ്റി ഭാരവാഹി എം. മജീദ് പറഞ്ഞു.
