നെടുങ്കണ്ടം: മഞ്ചാടി എന്ന് പേരുള്ള രണ്ട് വയസുകാരി പശുവിന് ചക്ക ഒരു ഹരമാണ്. ചക്കയുടെ മണം അടിച്ചാല്‍ പിന്നെ മറ്റു ആഹാരം വേണ്ട. എത്രകിട്ടിയാലും മതിയാവില്ല, ചക്ക ഒന്ന് നടുവേ മുറിച്ചു കിട്ടണം മുള്ള് ഇഷ്ടമല്ല. മുറിച്ചുകിട്ടുന്ന ചക്ക പതിനഞ്ചു മിനിറ്റ് കൊണ്ട് തൊലിപൊട്ടാതെ അവള്‍ കാര്‍ന്നു തിന്നും. കല്ലാര്‍ പട്ടം കോളനിയില്‍ ശക്തിവിലാസം ശശിധരന്‍ നായരുടെ ഭാര്യ രതിയമ്മയുടെ കളിക്കൂട്ടുകാരിയാണ് വെച്ചൂര്‍ ഇനത്തില്‍പെട്ട ഈ കൊച്ചു സുന്ദരി.
അഞ്ച് വര്‍ഷം മുന്‍പ് എഴുകുംവയലില്‍ നിന്നും യാദൃച്ഛികമായി കിട്ടിയതാണ് ഇവളുടെ അമ്മ കാമാക്ഷിയെ. പിന്നീട് കാമാക്ഷിയെ സഹോദരന് കൊടുത്തു. വീടിനുള്ളിലും മറ്റുമായി ഓമനിച്ചു വളര്‍ന്നതിനാല്‍ മഞ്ചാടി എന്ന പേരും ഇട്ടു.
ഇപ്പോള്‍ രതിയമ്മയുടെ കൂടെ പറമ്പിലും മറ്റും തുള്ളിച്ചാടി വളര്‍ന്നിരിക്കുകയാണ് ഈ കൊച്ചു കുറുമ്പി. മൈന എന്ന നായയാണ് മഞ്ചാടിയുടെ അടുത്ത കൂട്ടുകാരി. മേയാന്‍ പോയാല്‍ അവളാണ് കാവല്‍. രാത്രിയില്‍ കിടപ്പും ഒന്നിച്ചുതന്നെ. എന്തായാലും മഞ്ചാടിയുടെ കുറുമ്പ് നാട്ടിലാകെ പാട്ടായിരിക്കുകയാണ്.
പ്രതികരിക്കാൻ ഇവിടെ എഴുതുക: