ചെങ്ങന്നൂര്: മുളക്കുഴയില് മൂന്നാം ക്ലാസ് വിദ്യാര്ഥിക്ക് ട്യൂഷന് അധ്യാപകന്റെ മര്ദനം. അധ്യാപകന് അങ്ങാടിക്കല് മുരളിയാലത്തില് മുരളിക്കെതിരെ ചെങ്ങന്നൂര് പോലീസ് കേസെടുത്തു. ക്രൂരമായ മര്ദനത്തിന് കുട്ടി ഇരയായ വിവരം മുളക്കുഴ ഗ്രാമപഞ്ചായത്ത് പതിനെട്ടാം വാര്ഡ് മെമ്പര് പി.വി. ഐശ്വര്യയെ അയല്വാസികള് അറിയിക്കുകയായിരുന്നു.
ഗുണന പട്ടിക പഠിക്കാത്തതിന്റെ പേരിലാണ് മര്ദനമെന്നാണ് കുട്ടി വാര്ഡ് മെമ്പറോട് പറഞ്ഞത്. ഒന്ന് മുതല് ഒമ്പത് വരെയുള്ള ഗുണന പട്ടിക പഠിച്ചു കൊണ്ട് വരാന് ട്യൂഷന് അധ്യാപകന് പറയുകയും, അത് എഴുതിക്കാണിച്ചപ്പോള് ഒരു പട്ടികതെറ്റിച്ചതിനാണ് കുട്ടിയെ ക്രൂരമായി മര്ദിച്ചതെന്നും ഐശ്വര്യ പറഞ്ഞു. തുടര്ന്ന് വാര്ഡ് മെമ്പറാണ് ചൈല്ഡ് ലൈനിലും പോലീസിലും പരാതി നല്കിയത്.
ചൂരല് കൊണ്ട് തുടയിലും, വയറിലും കൈകാലുകളിലുമാണ് അടിച്ചത്. ജുവനൈല് നിയമപ്രകാരമാണ് കേസ്. ഇതോടൊപ്പം ലോക്ഡൗണ് ലംഘിച്ച് ട്യൂഷന് നടത്തിയതിനും കേസെടുത്തിട്ടുണ്ട്.
ജന്മഭൂമി ഓണ്ലൈന്