കോട്ടയം: കൊറോണ ബാധിച്ച് സൗദിയിലും ദല്ഹിയിലും ചികിത്സയിലായിരുന്ന കോട്ടയം ജില്ലാക്കാര് മരിച്ചു. കുറിച്ചി പുത്തന് പറമ്പില് ജോര്ജ്- മേരി ദമ്പതികളുടെ മകള് സിനി ജോര്ജ് (45) ആണ് സൗദിയില് മരിച്ചത്. കടുത്തുരുത്തി ഞീഴൂര് കണിരാംപറമ്പില് മധുസൂദനന്റെ ഭാര്യ രാജമ്മ മധുസൂദനന് (62) ദല്ഹിയിലും മരണമടഞ്ഞു.
കൊറോണ ബാധിച്ച് ജിദ്ദ മഹ്ജര് കിങ് അബ്ദുള് അസീസ് ആശുപത്രിയില് തീവ്രപരിചരണ വിഭാഗത്തില് സിനി ഒരാഴ്ച്ചയായി ചികിത്സയിലായിരുന്നു. ഒന്നാം തീയതിയാണ് മരിച്ചത്. തുടര്ന്ന് സഹപ്രവര്ത്തകര് നാട്ടിലുള്ള ബന്ധുക്കളെ വിവരമറിയിച്ചു. അല്- ഹനൂഫ് കോണ്ട്രാക്ടിങ്ങ് കമ്പനിക്ക് കീഴില് സ്വകാര്യ ആശുപത്രിയിലാണ് സിനി ജോലി ചെയ്തിരുന്നത്.
അഞ്ച് വര്ഷമായി ജിദ്ദയിലാണ്. 2019 മാര്ച്ച് 19 നാണ് അവസാനമായി നാട്ടിലെത്തിയത്. ഭര്ത്താവ്, തിരുവല്ല കോട്ടത്തോട് പരിയാരത്ത് വീട്ടില് സുരേഷ് ആനന്ദ്. മക്കള്: സനിഴ എസ്.ആനന്ദ് (ഡിഗ്രി വിദ്യാര്ത്ഥിനി), റിച്ചു എസ്.ആനന്ദ് (പ്ലസ് വണ് വിദ്യാര്ത്ഥി). മൃതദേഹം ജിദ്ദയില് സംസ്കരിക്കും. ദല്ഹിയില് കൊറോണ ബാധിച്ച് മരിച്ച രാജമ്മ വര്ഷങ്ങളായി അവിടെയാണ് താമസം. ഭര്ത്താവ് മധുസൂദനന് നിരീക്ഷണത്തിലാണ്. ഏകമകള് ദിവ്യയും മാതാപിതാക്കളോടെപ്പം ദല്ഹിയിലാണ് താമസം.
