കാഠ്മണ്ഡു: ഇന്ത്യയുടെ ഭാഗങ്ങൾ കൂടി കൂട്ടിചേർത്തുകൊണ്ടുള്ള പുതിയ ഭൂപടത്തിനും പുതിയ ചിഹ്നത്തിനും വേണ്ടിയുള്ള ഭരണഘടനാ ഭേദഗതി ബില്ല് നേപ്പാൾ പാർലമെന്റിൽ അവതരിപ്പിച്ചു. നേപ്പാള് നിയമ മന്ത്രി ശിവ മായയാണ് ബില് അവതരിപ്പിച്ചത്. ബില്ലിന് അനുകൂലമായി വോട്ടുചെയ്യുമെന്ന് നേപ്പാളിലെ പ്രതിപക്ഷ പാര്ട്ടിയായ കോണ്ഗ്രസ് അറിയിച്ചു.
ആഭ്യന്തരമായി ചര്ച്ച ചെയ്യാന് നേപ്പാളി കോണ്ഗ്രസ് കൂടുതല് സമയം ആവശ്യപ്പെട്ടതിനാല് ബില് ബുധനാഴ്ച അവതരിപ്പിക്കാന് സാധിച്ചിരുന്നില്ല. സാധാരണയായി നേപ്പാളില് ഭരണഘടനാ ഭേദഗതി ബില് പാസാവാന് ഒരുമാസമെടുക്കും. എന്നാല് ജനങ്ങളുടെ വികാരം കണക്കിലെടുത്ത് അടുത്ത 10 ദിവസത്തിനുള്ളില് ബില് പാസാക്കുന്നതിനുള്ള നടപടിക്രമങ്ങള് നേപ്പാള് പാര്ലമെന്റ് മറികടക്കുമെന്ന് അടുത്ത വൃത്തങ്ങള് പറയുന്നു.
ഇന്ത്യന് ഭൂപടത്തില് ഉള്പ്പെട്ട 370 ചതുരശ്ര കി.മീറ്റര് വരുന്ന ലിംപിയാദുരെ, കാലാപനി,ലിപുലേഖ് എന്നീ പ്രദേശങ്ങള് ഉള്പ്പെടുത്തിയുള്ളതാണ് നേപ്പാളിന്റെ പുതിയ ഭൂപടം. കൈലാസ് മാനസരോവര് യാത്രയ്ക്കുള്ള പാതയാണ് ലിപുലേഖ്. 1962ലെ ചെെനയുമായുള്ള യുദ്ധം മുതല് ഇന്ത്യ കാവല് നില്ക്കുന്ന വളരെ തന്ത്രപ്രധാനമായ മേഖലയാണിത്.
നേപ്പാളിന്റെ ഏകപക്ഷീയമായ പ്രവര്ത്തനം ചരിത്രപരമായ വസ്തുതകളെയും തെളിവുകളെയും അടിസ്ഥാനമാക്കിയുള്ളതല്ലെന്ന് കേന്ദ്ര സര്ക്കാര് നേരത്തെ പ്രതികരിച്ചിരുന്നു. പരസ്പര സംവേദനക്ഷമതയുടെയും പരസ്പര ബഹുമാനത്തിന്റെയും അടിസ്ഥാനത്തില് എല്ലാ അയല്ക്കാരുമായും ഇടപഴകാന് ഇന്ത്യ തയ്യാറാണെന്നും വിദേശകാര്യ വക്താവ് അനുരാഗ് ശ്രീവാസ്തവ പറഞ്ഞിരുന്നു.
ബ്രിട്ടീഷ് ഇന്ത്യ കാലഘട്ടത്തില് ഈസ്റ്റ് ഇന്ത്യ കമ്പനിയുമായി ഉണ്ടാക്കിയ ഉടമ്പടി പ്രകാരം നേപ്പാളിന്റെ അതിര്ത്തിയിലുള്ള ചെെനയുടെ പ്രദേശങ്ങളും നേപ്പാള് അവകാശപ്പെട്ടിരുന്നു.
