അതിര്‍ത്തിയില്‍ റോഡ് നിര്‍മാണം ഊര്‍ജ്ജിതമാക്കി ഇന്ത്യ; അക്സയ്ചിന്‍ പിടിച്ചെടുക്കുമെന്ന ആശങ്കയില്‍ ചൈന; ലഡാക്കില്‍ സൈന്യത്തെ വിന്യസിച്ച് കേന്ദ്രം

ന്യൂദല്‍ഹി: ലഡാക്കിലെ ചൈനീസ് അതിര്‍ത്തിയിലേക്ക് കൂടുതല്‍ സൈന്യത്തെ അയച്ച് ഇന്ത്യ. അതിര്‍ത്തിയിലെ റോഡ് നിര്‍മാണം തടയാന്‍ ലക്ഷ്യമിട്ട് അതിക്രമിച്ചു കയറിയ പ്രദേശത്തുനിന്ന് ചൈനീസ് സൈന്യം ഏകപക്ഷീയമായി പിന്മാറുന്നതു വരെ സ്ഥിതിഗതികള്‍ക്ക് യാതൊരു മാറ്റവുമുണ്ടാവില്ലെന്ന് ഇന്ത്യ സൈനിക, നയതന്ത്രതലങ്ങളില്‍ നടന്ന ചര്‍ച്ചയില്‍ അറിയിച്ചു. ദീര്‍ഘനാളേക്ക് നിലയുറപ്പിക്കാനാവശ്യമായ ക്രമീകരണങ്ങളും അതിര്‍ത്തിയില്‍ കരസേന എത്തിച്ചു. പാക്കിസ്ഥാന്‍ ചൈനയ്‌ക്ക് കൈമാറിയ ഇന്ത്യയുടെ ഭാഗമായിരുന്ന അക്സായ്ചിന്‍ പ്രദേശം പിടിച്ചെടുക്കാനാണ് ഇന്ത്യയുടെ ലക്ഷ്യമെന്ന ആശങ്കയാണ് റോഡ് നിര്‍മ്മാണം തടയാന്‍ ചൈന ശ്രമിക്കുന്നതിന് കാരണമെന്നാണ് വിദഗ്ധരുടെ വിലയിരുത്തല്‍.

അതിര്‍ത്തിയിലെ സംഘര്‍ഷാവസ്ഥ പരിഹരിക്കപ്പെടുമെന്ന് കാണിച്ച് ചൈനീസ് വിദേശകാര്യ മന്ത്രാലയം ബുധനാഴ്ച വൈകി പുറത്തിറക്കിയ പ്രസ്താവന സൈന്യവും കേന്ദ്രസര്‍ക്കാരും മുഖവിലയ്‌ക്കെടുക്കുന്നില്ല. ദല്‍ഹിയില്‍ ചേര്‍ന്ന സൈനിക കമാന്‍ഡര്‍മാരുടെ യോഗത്തിലും ചൈനീസ് അതിര്‍ത്തിയില്‍ കര്‍ശന നടപടികള്‍ സ്വീകരിക്കാന്‍ തീരുമാനിച്ചു. അതേസമയം, ഇന്ത്യ-ചൈന വിഷയത്തില്‍ മധ്യസ്ഥത വഹിക്കാമെന്ന അമേരിക്കന്‍ പ്രസിഡന്റ് ഡൊണാള്‍ഡ് ട്രംപിന്റെ വാഗ്ദാനവും ഇന്ത്യ തള്ളി. വിദേശകാര്യ വക്താവ് അനുരാഗ് ശ്രീവാസ്തവയാണ് ഇക്കാര്യം അറിയിച്ചത്.  

ലഡാക്കിലെ ഗല്‍വാന്‍ വാലിയില്‍ മൂന്നിടത്താണ് ചൈനീസ് സൈന്യത്തെ തടഞ്ഞ് ഇന്ത്യന്‍ സൈന്യം നിലയുറപ്പിച്ചത്. പാങ്ങോങ് തടാകത്തിന്റെ വടക്കന്‍ തീരത്ത് ഒരിടത്തും പീപ്പിള്‍സ് ലിബറേഷന്‍ ആര്‍മിയും ഇന്ത്യന്‍ കരസേനയും മുഖാമുഖം നിലയുറപ്പിച്ചിരിക്കുയാണ്. മഞ്ഞു മാറിയതോടെ ലഡാക്ക് അതിര്‍ത്തിയിലെ തന്ത്രപ്രധാന മേഖലകളില്‍ റോഡ് നിര്‍മാണമടക്കമുള്ള അടിസ്ഥാന സൗകര്യ വികസന പ്രവര്‍ത്തനങ്ങള്‍ ഇന്ത്യ ഊര്‍ജ്ജിതമാക്കിയിരുന്നു. ഇതിനെ തടയുകയാണ് പെട്ടെന്നുള്ള ചൈനീസ് പ്രകോപനത്തിന് കാരണം. 255 കിലോമീറ്റര്‍ നീളുന്ന ദൗളത് ബേഗ് ഓര്‍ഡി റോഡ് നിര്‍മാണത്തിന് യാതൊരുവിധ തടസവും സൃഷ്ടിക്കാതിരിക്കാനുള്ള സൈനിക വിന്യാസം കരസേന ഇവിടെ നടത്തിക്കഴിഞ്ഞു.

കാരക്കോറം പാസിലെ അവസാന സൈനിക പോസ്റ്റാണ് ദൗലത് ബേഡ് ഓള്‍ഡി. 2013ല്‍ ഇന്ത്യന്‍ സൈന്യം ഏറ്റവും വലിയ യുദ്ധവിമാനങ്ങളിലൊന്നായ സി130 ജെ സൂപ്പര്‍ ഹെര്‍ക്കുലീസ് ഇവിടെ ഇറക്കിയത് വലിയ ശ്രദ്ധ നേടിയിരുന്നു. അതിര്‍ത്തിയിലേക്ക് കൂടുതല്‍ വേഗത്തില്‍ സൈന്യത്തേയും സൈനിക വാഹനങ്ങളേയും എത്തിക്കാന്‍ ഇതുവഴി ഇന്ത്യക്ക് സാധിക്കും. ഇതിന് പുറമേയാണ് ദേശീയപാതാ നിര്‍മാണം. പാക്കിസ്ഥാന്‍ ചൈനയ്‌ക്ക് കൈമാറിയ ഇന്ത്യന്‍ ഭൂപ്രദേശമായ അക്സായ്ചിന്നിലേക്ക് നേരിട്ട് ഇന്ത്യക്ക് ബന്ധപ്പെടാന്‍ സാധിക്കുന്ന തന്ത്രപ്രധാന പോയിന്റ്കൂടിയാണ് ദൗലത് ബേഗ് ഓള്‍ഡി.

ഇതിന് മറുപടിയായി പാങ്ങോങ് തടാകത്തിന് ഇരുനൂറ് കിലോമീറ്റര്‍ അകലെ ചൈനയും പുതിയ വിമാനത്താവള നിര്‍മാണം ആരംഭിച്ചതായി ഇന്ത്യന്‍ സാറ്റലൈറ്റുകള്‍ കണ്ടെത്തിയിരുന്നു. അടുത്ത മഞ്ഞുകാലം വരെ നിര്‍മ്മാണം പ്രതിസന്ധിയിലാക്കാനുള്ള നീക്കമാണ് ചൈനയുടേത്.

നെഹ്‌റുവിന്റെ വിശ്വാസത്തെ ചതിച്ച് ആക്രമിച്ച ചൈന  https://www.janmabhumi.in/read/china-attacking-nehrus-faith/