തിരുവനന്തപുരം: സംസ്ഥാനത്തെ സ്വകാര്യ, അണ്എയ്ഡഡ് സ്കൂളുകളിലെ ഫീസ് ഘടന നിശ്ചയിക്കുന്നതിനും നിയന്ത്രിക്കുന്നതിനും നിയന്ത്രണസംവിധാനം ഏര്പ്പെടുത്തണമെന്ന് സംസ്ഥാന ബാലാവകാശ സംരക്ഷണ കമ്മീഷന് സര്ക്കാരിനോട് ശുപാര്ശ ചെയ്തു. ചെയര്മാന് പി. സുരേഷ്, അംഗങ്ങളായ ഫാ. ഫിലിപ്പ് പരക്കാട്ട്, കെ. നസീര് എന്നിവര് ഉള്പ്പെട്ട ഫുള്ബെഞ്ചാണ് സര്ക്കാരിന് ശുപാര്ശ നല്കിയത്. നിയമനിര്മാണം നടപ്പാകുന്നതുവരെ സ്വതന്ത്രമായി ഫീസ് ഘടന നിശ്ചയിക്കുന്നതിന് മോണിറ്ററിംഗ് സമിതി രൂപീകരിക്കണമെന്നും കമ്മീഷന് ശുപാര്ശയില് പറയുന്നു. കേരള സ്വാശ്രയ പ്രൊഫഷണല് കോളേജ് (ക്യാപ്പിറ്റേഷന് ഫീസ് നിരോധനവും പ്രവേശനവും ഫീസ് നിര്ണയ നടപടിക്രമങ്ങളും) ആക്ട് 2004 ന്റെ മാതൃകയിലുള്ള സംവിധാനം നിയമനിര്മാണം വഴിയോ മറ്റു രീതിയിലോ നടപ്പാക്കണം. ഇതിനുള്ള നടപടികള് പൊതുവിദ്യാഭ്യാസ സെക്രട്ടറി ചെയ്യേണ്ടതാണ്.
സംസ്ഥാനത്തെ സ്വകാര്യ സ്വാശ്രയ പ്രാഥമിക വിദ്യാഭ്യാസ സ്ഥാപനങ്ങളുടെ ഫീസ് നിര്ണയിക്കുന്ന കാര്യത്തില് മാനദണ്ഡമോ അടിസ്ഥാനമോ ഇല്ല. അടിസ്ഥാനസൗകര്യങ്ങളും സല്പ്പേരും മാനദണ്ഡമാക്കിയാണ് വര്ധിച്ച തോതിലുള്ള ഫീസ് ഇത്തരം സ്ഥാപനങ്ങള് ഈടാക്കുന്നത്. സ്വകാര്യ മാനേജ്മെന്റ് ആവശ്യപ്പെടുന്ന സംഖ്യ കൊടുക്കാന് സാഹചര്യങ്ങളുടെ സമ്മര്ദങ്ങളാല് കുട്ടികള് നിര്ബന്ധിതരാകുന്നു. കേരളം പോലുള്ള സംസ്ഥാനത്ത് മാനദണ്ഡമില്ലാത്ത ഫീസ് സ്വകാര്യ സ്വാശ്രയ വിദ്യാഭ്യാസ സ്ഥാപനങ്ങള് ഈടാക്കുന്നത് ഒരു പ്രത്യേക കമ്മറ്റിയെ നിയോഗിച്ചോ നിയമനിര്മാണം മൂലമോ നിയന്ത്രിക്കേണ്ടതുണ്ടെന്ന് കമ്മീഷന് വിലയിരുത്തി. ഈ നടപടി സുതാര്യവുമായിരിക്കണം.
ലാഭേച്ഛയോടെയല്ല മാനേജ്മെന്റ് സ്ഥാപനം നടത്തിക്കൊണ്ടു പോകേണ്ടതെന്നും കോടതി നിരീക്ഷിച്ചിട്ടുണ്ട്. തിരുവനന്തപുരത്തെ സ്വകാര്യസ്കൂളിലെ പ്രവേശനസമയത്ത് വാങ്ങിയ ഡിപ്പോസിറ്റ് തുക സംബന്ധിച്ച പരാതികള് തീര്പ്പാക്കിയാണ് കമ്മീഷന് നിര്ണായകമായ ഉത്തരവ് പുറപ്പെടുവിച്ചത്.
