നെടുമ്പാശേരി: വിദേശത്ത് കുടുങ്ങിയ പ്രവാസികളുമായി ആറു വിമാനങ്ങള്‍ കൊച്ചി അന്താരാഷ്‌ട്ര വിമാനത്താവളത്തില്‍ എത്തി. വിവിധ രാജ്യങ്ങളില്‍ നിന്നായി 945 ഓളം പ്രവാസികളാണ് എത്തിയത്. ഉക്രയിന്‍, അയര്‍ലാന്റ്, ദുബൈ, അബുദാബി, കുവൈറ്റ് എന്നിവിടങ്ങളില്‍ നിന്നാണ് ഇന്നലെ പ്രവാസികള്‍ എത്തിയത്.
ഉക്രയിനില്‍ നിന്നും 142 പ്രവാസികളുമായി ഇന്നലെ രാവിലെ എട്ട് മണിക്കാണ് എയര്‍ ഇന്ത്യ വിമാനം കൊച്ചി അന്താരാഷ്‌ട്ര വിമാനത്താവളത്തിലെത്തിയത്. വൈകീട്ട് 5.31 ന് ദുബൈയില്‍ നിന്നും എത്തിയ എയര്‍ ഇന്ത്യ എക്‌സ്പ്രസ് വിമാനത്തില്‍ കുട്ടികളടക്കം 185 പ്രവാസികളാണ് ഉണ്ടായിരുന്നത്. രാത്രി 8.47ന് എയര്‍ ഇന്ത്യ എക്‌സ്പ്രസിന്റെ ഐ എക്‌സ് 1452 നമ്പര്‍ വിമാനം അബുദാബിയില്‍ നിന്നുള്ള 183 പ്രവാസികളുമായാണ് നെടുമ്പാശേരിയിലെത്തിയത്. ഇതില്‍ പത്ത് വയസ്സില്‍ താഴെ പ്രായമായ ആറ് കുട്ടികളും ഉള്‍പ്പെടുന്നു. രാത്രി 9.45ന് അയര്‍ലാന്റിലെ ഡബ്ലിനില്‍ നിന്നും എത്തിയ എയര്‍ ഇന്ത്യ വിമാനത്തില്‍ 125 പേരാണ് ഉണ്ടായിരുന്നത്. കൂടാതെ അബുദാബി, കുവൈറ്റ് എന്നിവിടങ്ങളില്‍ നിന്നായി പൊതുമാപ്പ് ലഭിച്ച 300 ഓളം പ്രവാസികളും മടങ്ങിയെത്തി. അബുദാബിയില്‍ നിന്നും ഇന്നലെ രാത്രി 8.29ന് എത്തിയ ഇത്തിഹാദ് വിമാനത്തിലും കുവൈറ്റില്‍ നിന്നും രാത്രി 8.16ന് എത്തിയ ജസീറ വിമാനത്തിലുമാണ് പൊതുമാപ്പ് ലഭിച്ചവരെ നാട്ടിലെത്തിച്ചത്.
ഇന്ന് പുലര്‍ച്ചെ 4.20ന് വിമാനം കൊച്ചിയിലെത്തും. അയര്‍ലന്റില്‍ നിന്നുള്ള 125 മലയാളികളുമായി ഡബ്ലിന്‍ വിമാനത്താവളത്തില്‍ നിന്ന് പുറപ്പെടുന്ന മറ്റൊരു എയര്‍ ഇന്ത്യ വിമാനം ഇന്ന് വൈകിട്ട് 5.45ന് കൊച്ചി വിമാനത്താവളത്തിലെത്തും. 16 അഭ്യന്തര സര്‍വീസുകളും ഇന്നലെ കൊച്ചി അന്താരാഷ്‌ട്ര വിമാനത്താവളത്തില്‍ നിന്ന് ഉണ്ടായിരുന്നു.
പ്രതികരിക്കാൻ ഇവിടെ എഴുതുക: