കൊച്ചി: സാമൂഹിക വ്യാപന സാധ്യത പരിശോധിക്കാനും പരിശോധന വ്യാപകമാക്കാനുമായി നടത്തുന്ന മുന്‍ഗണനാ ക്രമത്തിലുള്ള പരിശോധന കൊറോണ നിരീക്ഷണ കേന്ദ്രങ്ങളില്‍ ആരംഭിച്ചു. സുരക്ഷാ ഉപകരണങ്ങളുടെ സഹായത്തോടു കൂടി ഡോക്ടറും മൈക്രോ ബയോളജിസ്റ്റും ഉള്‍പ്പെട്ട സംഘമാണ് നിരീക്ഷണ കേന്ദ്രങ്ങളില്‍ നേരിട്ടെത്തി പരിശോധന നടത്തുന്നത്.
ശേഖരിച്ച സാമ്പിളുകള്‍ പൂളിങ് നടത്തി പരിശോധിക്കുന്നതിനാല്‍ വേഗത്തില്‍ കൂടുതല്‍ ആളുകളുടെ പരിശോധന പൂര്‍ത്തിയാക്കാന്‍ സാധിക്കും. വിദേശത്തു നിന്നെത്തിയ ആളുകള്‍, കപ്പലില്‍ എത്തുന്ന ആളുകള്‍, ഇതര സംസ്ഥാനങ്ങളില്‍ നിന്നുള്ളവര്‍, സന്നദ്ധ പ്രവര്‍ത്തകര്‍, കൊറോണ ഇതര ആശുപത്രികളില്‍ സേവനമനുഷ്ഠിക്കുന്ന ആരോഗ്യ പ്രവര്‍ത്തകര്‍, പോലീസുകാര്‍, തുടങ്ങിയ ഏഴ് വിഭാഗങ്ങളിലാണ് നിലവില്‍ പരിശോധന നടത്തുന്നത്.
നിലവില്‍ ഇത്തരത്തില്‍ 30 സാമ്പിളുകളുടെ പരിശോധന പൂര്‍ത്തിയാക്കി. ഒന്നിടവിട്ട ദിവസങ്ങളിലാണ് സാമ്പിള്‍ ശേഖരണം. പരിശോധക്ക് വിധേയരാക്കുന്ന ആളുകളെ ഗ്രൂപ്പുകളായി തിരിച്ചു ഓരോ ഗ്രൂപ്പിലെയും ആളുകളുടെ സാമ്പിളുകള്‍ ഒരുമിച്ചു കലര്‍ത്തിയാണ് പൂള്‍ ടെസ്റ്റ് നടത്തുന്നത്. ആര്‍ക്കും രോഗമില്ലെങ്കില്‍ ഫലം നെഗറ്റീവ് ആയിലഭിക്കും. പോസിറ്റീവ് ഫലം ലഭിച്ചാല്‍ ഓരോരുത്തരുടെയും സാമ്പിളുകള്‍ തനിയെ പരിശോധിക്കും. സാമൂഹിക വ്യാപന സാധ്യത പരിശോധിക്കാനായി മുന്‍പ് നടത്തിയിരുന്ന പരിശോധനയില്‍ ജില്ലയുടെ വിവിധ ഭാഗങ്ങളില്‍ നിന്നുള്ള വിവിധ വിഭാഗങ്ങളില്‍പെട്ട 136 സാമ്പിളുകള്‍ പരിശോധിച്ചിരുന്നു.
പ്രതികരിക്കാൻ ഇവിടെ എഴുതുക: