പാലക്കാട്: കോറോണ വൈറസ് നിരീക്ഷണത്തില് കഴിഞ്ഞിരുന്ന അട്ടപ്പാടി സ്വദേശിയായ യുവാവ് മരിച്ചു. ഷോളയൂര് വരഗം പാടി സ്വദേശിയായ കാര്ത്തിക്ക് (23) ആണ് മരിച്ചത്. ഇയാള്ക്ക് കോവിഡ് ഉണ്ടായിരുന്നോ എന്നത് സംബന്ധിച്ച് പരിശോധന നടത്തുമെന്ന് അധികൃതര് അറിയിച്ചു.
പനി മൂര്ച്ഛിച്ചതിനെ തുടര്ന്ന് കണ്ടു ദിവസം മുമ്പാണ് കാര്ത്തിക്കിനെ കോട്ടത്തറ ആശുപത്രിയില് പ്രവേശിപ്പിച്ചത്. പിന്നീട് പെരിന്തല്മണ്ണ ഇഎംഎസ് ആശുപത്രിയിലേക്ക് മാറ്റി. ആരോഗ്യനില വീണ്ടും മോശമായതിനെ തുടര്ന്നാണ് മഞ്ചേരി മെഡിക്കല് കോളേജിലേക്ക് മാറ്റാന് ശ്രമിക്കുന്നതിനിടയിലാണ് മരണം സംഭവിച്ചത്. ഇയാള്ക്ക് മഞ്ഞപ്പിത്തവും വൃക്കരോഗവും ഉണ്ടായിരുന്നതായി ഡോക്ടര്മാര് പറഞ്ഞു.
അതേസമയം മൂന്ന് ആഴ്ച്ച മുമ്പ് കോയമ്പത്തൂരില് ഒരു മരണാനന്തര ചടങ്ങുകളില് ഇയാള് പങ്കെടുത്തിരുന്നു. കോയമ്പത്തൂരില് നിന്ന് ഏപ്രില് 29 ന് വനത്തിലൂടെ നടന്നാണ് ഇയാള് ഊരിലെത്തിയത്. ഇതിനെ തുടര്ന്നാണ് ഇയാള്ക്ക് കൊറോണ വൈറസ് രോഗബാധ ഉണ്ടായിരുന്നോയെന്ന് സംശയം ഉയര്ന്നത്.
