കൊച്ചി : കന്യാസ്ത്രീ മഠത്തിലെ അന്തേവാസിയായ വിദ്യാര്ത്ഥിനി മരിച്ച സംഭവത്തില് സഭയ്ക്കെതിരെ വിമര്ശനവുമായി സിസ്റ്റര് ലൂസി കളപ്പുരയ്ക്കല്. തിരുവല്ല പാലിയേക്കര ബസേലിയന് സിസ്റ്റേഴ്സ് മഠത്തിലെ സന്യാസി വിദ്യാര്ത്ഥിവി ദിവ്യ കിണറ്റില് വീണ് മരിച്ച സംഭവത്തിലെങ്കിലും നീതി കിട്ടുമോ, വിഷയത്തില് പഴുതുകള് അടച്ച് അന്വേഷണം നടത്തുമെന്ന് കരുതാമോയെന്നും സിസ്റ്റര് ലൂസി കളപ്പുരയ്ക്കല് എഫ്ബി പോസ്റ്റിലൂടെ ചോദിച്ചു.
ദിവ്യയുടെ മാതാപിതാക്കള്ക്കെങ്കിലും നീതി ലഭിക്കണം. അതോ അവര് വര്ഷങ്ങളോളം ഇതിനായി അലയേണ്ടി വരുമോ. പഴുതടച്ചുള്ള ഒരു അന്വേഷണം ഇതിലെങ്കിലും നടത്തണമെന്നും സിസ്റ്റര് ആവശ്യപ്പെട്ടു.
അടിമത്തവും, വിവേചനങ്ങളും, അടിച്ചമര്ത്തലുകളും ഭയപ്പാടും കടിച്ചമര്ത്തുന്ന വേദനകളുമൊക്കെയാണ് ഓരോ കന്യാസ്ത്രീയുടേയും ജീവിത കഥ. കഴിഞ്ഞ മുപ്പത്തഞ്ച് വര്ഷത്തില് ഏറെയായി ഒരു സന്യാസിനിയായി ജീവിക്കുന്നതിനിടയില് ഇത്തരത്തില് നിരവധി സംഭവങ്ങള് നേരിട്ട് കാണാനും കേള്ക്കാനും ഇടയായിട്ടുണ്ട്. ജിവനറ്റ നിലയില് കണ്ടെത്തിയ കന്യാസ്ത്രീകളുടെ ലിസ്റ്റ് പോലും വളരെ വലുതാണ്. കന്യാസ്ത്രീകളുടെ മരണം പോലും ഇന്ന് വാര്ത്തയല്ല. ഇതെല്ലാം കണ്ടും കേട്ടും മൃതശരീരം പോലെ ഇനിയും ജീവിക്കാന് സാധിക്കില്ലെന്നും ലൂസി കളപ്പുരയ്ക്കല് അറിയിച്ചു.
കുഞ്ഞുകുഞ്ഞു മോഹങ്ങളും പ്രതീക്ഷകളും സ്വപ്നങ്ങളും വേദനകളും കണ്ണീരുമൊക്കെയുള്ള ഒരു കൂട്ടം പാവം സ്ത്രീകളാണ് ഇ കന്യാസ്ത്രീകള്. പുലര്ച്ച മുതല് പാതിരാ വരെ അടിമകളെപ്പോലെ പണിചെയ്യിച്ചാലും, അധിക്ഷേപിച്ചും അടിച്ചമര്ത്തിയും മനസു തകര്ത്താലും, പാതിരാത്രിയില് ഏതെങ്കിലും നരാധമന്റെ കിടപ്പു മുറിയിലേക്ക് തള്ളിവിട്ടാലും, ഒടുവില് പച്ചജീവനോടെ കിണറ്റില് മുക്കിക്കൊന്നാലുമൊന്നും ആരും ചോദിക്കാനില്ല്. എന്നെപ്പോലെ ആരെങ്കിലും എവിടെയെങ്കിലും ഈ സത്യങ്ങളൊക്കെ വിളിച്ചു പറയാന് തയ്യാറായാല് അവരെ ജീവനോടെ കത്തിക്കാന് പോലും മടിക്കില്ല ഈ കൂട്ടം എന്നെനിക്കറിയാമെന്നും അവര് കൂട്ടിച്ചേര്ത്തു.
