കൊച്ചി: പ്രവാസികളുടെ ബാഗേജുകളെ അണുനശീകരണം നടത്താന് ഡിഫന്സ് റിസര്ച്ച് ഡവലപ്മെന്റ് ഓര്ഗനൈസേഷന്റെ സഹായമുള്പ്പെടെ വിപുലമായ സന്നാഹമാണ് സിയാലില് ഒരുക്കിയിട്ടുള്ളത്. ജില്ലാ അധികൃതര്, സംസ്ഥാന സര്ക്കാര് ആരോഗ്യവകുപ്പ്, പോലീസ്, തദ്ദേശ സ്ഥാപനങ്ങള്, സിഐഎസ്എഫ് എന്നീ വിഭാഗങ്ങളുടെ ഏകോപനത്തോടെ കൊറോണ പ്രോട്ടോക്കോള് പാലിച്ചുകൊണ്ടുള്ള പദ്ധതിയാണ് സിയാലില് നടപ്പിലാക്കുന്നത്.
ഉച്ചയ്ക്ക് പന്ത്രണ്ട് മണിയോടെ എയര് ഇന്ത്യ എക്സ്പ്രസ് വിമാനം കൊച്ചിയില് നിന്ന് അബുദാബിയിലേയ്ക്ക് പറക്കും. വൈകീട്ട് അഞ്ചരയോടെയാകും യാത്രക്കാരുമായി മടക്കയാത്ര. വിമാനത്തിനെ അണുവിമുക്തമാക്കല് നടപടികള് പൂര്ത്തിയായി. യാത്രക്കാര് പൂരിപ്പിച്ചുനല്കേണ്ട സത്യവാങ്മൂലം ഉള്പ്പെടെയുള്ള ഫോറങ്ങള് ഈ വിമാനത്തില് കൊടുത്തുവിടും. യാത്രക്കാരുമായി തിരികെയെത്തുന്ന വിമാനത്തിന് പ്രത്യേക പാര്ക്കിങ് ബേ, എയറോബ്രിഡ്ജുകള് എന്നിവ ലഭ്യമാക്കും.
ടെര്മിനലിലേയ്ക്ക് പ്രവേശിക്കുമ്പോള് തന്നെ ടെമ്പറേച്ചര് ഗണ്, തെര്മല് സ്കാനര് ഇവ ഉപയോഗിച്ച് യാത്രക്കാരുടെ താപനില പരിശോധിക്കും. രോഗലക്ഷണമുള്ളവരെ പ്രത്യേക പാതയിലൂടെ ആംബുലന്സിലേയ്ക്ക് മാറ്റും. അവിടെ നിന്ന് ആലുവ ആശുപത്രിയിലേയ്ക്ക് കൊണ്ടുപോകും.
രോഗലക്ഷണമില്ലാത്തവര്ക്ക് ഹെല്ത്ത് കൗണ്ടറുകളില് വീണ്ടും ആരോഗ്യ പരിശോധന നടത്തും. തുടര്ന്ന് ഇവരെ ഇമിഗ്രേഷന് കൗണ്ടറില് എത്തിക്കും. പത്തു ഉദ്യോഗസ്ഥര്ക്ക് ജോലി ചെയ്യാന് പാകത്തില് ഇമിഗ്രേഷന് കൗണ്ടറുകളില് ഗ്ലാസ് മറകള് സ്ഥാപിച്ചിട്ടുണ്ട്. തുടര്ന്ന് ഇവരെ ബാഗേജ് ഏരിയയിലേയ്ക്ക് കൊണ്ടുപോകും.
ഇമിഗ്രേഷന് കൗണ്ടറുകള്ക്ക് മുമ്പിലും കണ്വെയര് ബെല്റ്റിന് വശങ്ങളിലും സാമൂഹിക അകലം പാലിച്ച് നില്ക്കാനുള്ള പ്രത്യേക അടയാളങ്ങള് വച്ചിട്ടുണ്ട്. അഞ്ചാം നമ്പര് ബെല്റ്റാണ് ഇതിനായി അനുവദിച്ചിട്ടുള്ളത്.
യാത്രക്കാരുമായി നേരിട്ട് ബന്ധപ്പെടുന്ന ജീവിനക്കാര്ക്കായി പി.പി.ഇ കിറ്റുകള് ലഭ്യമാക്കിയിട്ടുണ്ട്. എല്ലാ യാത്രക്കാര്ക്കും കയ്യുറകള്, ഭക്ഷണം, വെള്ളം എന്നിവയടങ്ങിയ പായ്ക്കറ്റ് സിയാല് നല്കും.
സിയാലിലെ അമ്പതോളം ഏജന്സികളിലെ ജീവനക്കാര്ക്ക് സാമൂഹിക അകലം പാലിക്കലുമായി ബന്ധപ്പെട്ട നിര്ദേശങ്ങള് നല്കിക്കഴിഞ്ഞു. സിന്തറ്റിക്, തുണി, ലെതര് എന്നീ ആവരണമുള്ള ഫര്ണിച്ചര് എല്ലാം മാറ്റിയിട്ടുണ്ട്. രണ്ടായിരത്തോളം പ്ലാസ്റ്റിക് കസേര താല്ക്കാലികമായി ഒരുക്കിക്കഴിഞ്ഞു. ടെര്മിനലും ഉപകരണങ്ങളും മൂന്നുഘട്ടങ്ങളിലായി അണുനാശനം വരുത്തിക്കഴിഞ്ഞു. ഓരോ സര്വീസിന് ശേഷവും ഈ പ്രക്രിയ ആവര്ത്തിക്കും.
