കണ്ണൂര്‍: കണ്ണൂരില്‍ കൊറോണ പ്രതിരോധ നടപടിയെ ചൊല്ലി എസ്പിയും കളക്ടറും തമ്മില്‍ അഭിപ്രായ ഭിന്നത. ജില്ലയില്‍ ഹോട്ട്സ്പോട്ട് അല്ലാത്ത ഇടങ്ങള്‍ കണ്ടെയ്ന്‍മെന്റ് സോണുകളാക്കിയ എസ്പിയുടെ നടപടിക്കെതിരേ കളക്ടര്‍ ഇന്നലെ ഉത്തരവിറക്കി. ഹോട്ട്സ്പോട്ട് അല്ലാത്തയിടങ്ങളില്‍ കര്‍ശന നിയന്ത്രണങ്ങള്‍ പാടില്ലെന്നും റോഡിലെ തടസ്സങ്ങള്‍ അടിയന്തരമായി നീക്കം ചെയ്യണമെന്നും കലക്ടര്‍ കത്തിലൂടെ എസ്പിയോട് ആവശ്യപ്പെടുകയായിരുന്നു.
ഇക്കാര്യം ഉന്നയിച്ച് കളക്ടര്‍ ടി.വി. സുഭാഷ് ജില്ലാ പോലീസ് മേധാവി യതീഷ് ചന്ദ്രയ്‌ക്ക് കത്തയച്ചു. പ്രധാനമായും അഞ്ച് കാര്യങ്ങള്‍ എടുത്തു പറഞ്ഞുകൊണ്ടുള്ളതാണ് കത്ത്. ജില്ലയില്‍ സാമൂഹിക വ്യാപനം ഇല്ലെന്നിരിക്കെ എസ്പി കണ്ടെയ്ന്‍മെന്റ് സോണ്‍ തിരിച്ചത് എന്ത് അധികാരം ഉപയോഗിച്ചാണെന്നും റോഡുകള്‍ ബ്ലോക്ക് ചെയ്യേണ്ട ആവശ്യമെന്താണെന്നും കത്തില്‍ കളക്ടര്‍ ചോദിച്ചു.റോഡുകള്‍ കൊട്ടിയടച്ചത് കാരണം ആംബുലന്‍സുകള്‍ തിരിച്ചുവിടേണ്ടി വന്നുവെന്നും ഡയാലിസിസ് രോഗികള്‍ക്ക് ആശുപത്രിയില്‍ പോകാന്‍ സാധിച്ചില്ലെന്നും കളക്ടര്‍ ചൂണ്ടിക്കാട്ടി.
ജില്ലയിലെ ഒരു യോഗത്തിലും ഇത്തരമൊരു തീരുമാനം എടുത്തിട്ടില്ലെന്നിരിക്കെ എങ്ങനെയാണ് ഇത്തരമൊരു നടപടിയിലേക്ക് നീങ്ങിയതെന്നും കളക്ടര്‍ ചോദിച്ചു. ബ്ലോക്ക് ചെയ്ത റോഡുകള്‍ മുഴുവന്‍ തുറന്ന് വാഹനങ്ങള്‍ കടത്തിവിടണമെന്നും കളക്ടര്‍ ആവശ്യപ്പെട്ടു. കോവിഡ് സംബന്ധമായുള്ള യോഗങ്ങളില്‍ ജില്ലാ പോലീസ് മേധാവി പങ്കെടുക്കാത്തത് എന്തുകൊണ്ടാണെന്ന് ആരാഞ്ഞ കളക്ടര്‍ ഇനിയുള്ള യോഗങ്ങളില്‍ പങ്കെടുക്കണമെന്ന നിര്‍ദേശവും കത്തിലൂടെ എസ്പിയെ അറിയിച്ചിട്ടുണ്ട്.
ഹോട്ട്‌സ്‌പോട്ടുകളല്ലാത്ത ഇടങ്ങളില്‍ റോഡുകള്‍ ബ്ലോക്ക് ചെയ്തതിന് നാട്ടുകാരുടെ ഭാഗത്തുനിന്നും മറ്റും വലിയ പരാതി ഉയര്‍ന്ന സാഹചര്യത്തില്‍ കൂടിയാണ് കളക്ടര്‍ പുതിയ ഉത്തരവ് പുറത്തിറക്കിയത്. രോഗ പ്രതിരോധ പ്രവര്‍ത്തനങ്ങള്‍ക്കിടയില്‍ എസ്പിയും കളക്ടറും തമ്മിലുളള ഭിന്നത പരസ്യമായത് ചര്‍ച്ചയായിരിക്കുകയാണ്.
ജന്മഭൂമി ഓണ്‍ലൈന്‍
പ്രതികരിക്കാൻ ഇവിടെ എഴുതുക: