ന്യൂദല്‍ഹി : നിലവിലെ സ്ഥിതിഗതികളില്‍ രാജ്യത്തെ ലോക്ഡൗണ്‍ പിന്‍വലിക്കരുതെന്ന് പഠന റിപ്പോര്‍ട്ട്. നിയന്ത്രണങ്ങള്‍ പിന്‍വലിച്ചാല്‍ രോഗബാധിതരുടെ എണ്ണം വരും നാളുകളില്‍ വര്‍ധിക്കാന്‍ സാധ്യതയുണ്ടെന്നും ചൂണ്ടിക്കാട്ടി മൂന്ന് ഗവേഷണ സ്ഥാപനങ്ങള്‍ കേന്ദ്ര സര്‍ക്കാരിന് റിപ്പോര്‍ട്ട് നല്‍കി. കേന്ദ്ര സര്‍ക്കാരിന്റെ ശാസ്ത്ര ഉപദേഷ്ടാവിന്റെ നിര്‍ദ്ദേശപ്രകാരം ബെംഗളൂരുവിലെ ഇന്ത്യന്‍ ഇന്‍സ്റ്റിറ്റ്യൂട്ട് ഓഫ് സയന്‍സ്, ഐഐടി ബോംബെ, ജവഹര്‍ലാല്‍ നെഹ്‌റു സെന്റര്‍ ‘ഫോര്‍ അഡ്വാന്‍സ്ഡ് സയന്റിഫിക് റിസര്‍ച്ച് എന്നീ ഗവേഷണ സ്ഥാപനങ്ങള്‍ ചേര്‍ന്നാണ് പഠനം നടത്തിയത്.
ഇതുപ്രകാരം ഓഗസ്റ്റ് വരെയെങ്കിലും രോഗ ഭീഷണി നിലനില്‍ക്കാന്‍ സാധ്യതയുണ്ട്. നിയന്ത്രണങ്ങള്‍ പിന്‍വലിച്ചാല്‍ മേയ് അവസാനത്തോടെ രോഗബാധിതരുടെ എണ്ണം ഒന്നര ലക്ഷം പിന്നിട്ടേക്കാം. ഏപ്രില്‍ അവസാനത്തോടെ രാജ്യത്ത് മരണ സംഖ്യ ആയിരം പിന്നിടാം. മെയ് അഞ്ചോടെ മൂവായിരം കടക്കും. മെയ് 12 ഓടെ പതിനായിരം പിന്നിട്ടേക്കാം. അങ്ങനെയെങ്കില്‍ മെയ് അവസാനത്തോടെ അന്‍പതിനായിരത്തിലേക്ക് അടുക്കുമെന്നാണ് റിപ്പോര്‍ട്ടില്‍ പറയുന്നത്.
ലോക്ഡൗണ്‍ പിന്‍വലിച്ച് രണ്ടാഴ്ച പിന്നിടുമ്പോഴേക്കും രോഗ ബാധിതരുടെ എണ്ണം 65000ല്‍ എത്താം. മെയ് അവസാനം ഒന്നര ലക്ഷം കടക്കും. ജൂണ്‍ പകുതിയോടെ മൂന്ന് ലക്ഷവും, ജൂണ്‍ അവസാനത്തോടെ പതിനൊന്ന് ലക്ഷവും കടന്നേക്കാമെന്നാണ് വ്യക്തമാകുന്നത്. അതിനാല്‍ ഏറെ കരുതലോടെ മാത്രമേ നിയന്ത്രണങ്ങളില്‍ ഇളവ് വരുത്താവൂയെന്നാണ് റിപ്പോര്‍ട്ടിലെ നിര്‍ദ്ദേശത്തില്‍ വ്യക്തമാക്കുന്നു. കൂടുതല്‍ മുന്‍കരുതല്‍സ്വീകരിക്കണമെന്നും ഇത് നിര്‍ദ്ദേശിച്ചിട്ടുണ്ട്.
മേയ് പകുതിയോടെ എഴുപത്തി ആറായിരം അധിക കിടക്കകള്‍ കൂടി ആശുപത്രികളില്‍ സജ്ജമാക്കണം, വെന്റിലേറ്ററുകളും ഓക്‌സിജന്‍ സിലിണ്ടറുകളും കൂടുതല്‍ കരുതണം, പിപിഇ കിറ്റുകളും, എന്‍ 95 മാസ്‌കുകളും ഇരട്ടി സംഭരിക്കാനും നിര്‍ദ്ദേശിച്ചിട്ടുണ്ട്.
അതേസമയം രണ്ടാംഘട്ട ലോക്ഡൗണ്‍ മേയ് മൂന്നിന് ആവസാനിക്കും ഇതിന്റെ ഭാഗമായി ചില ഇളവുകളും നല്‍കിയിട്ടുണ്ട്. എന്നാല്‍ ഇതിനോടകം തന്നെ ആറ് സംസ്ഥാനങ്ങള്‍ ലോക്ഡൗണ്‍ നീട്ടണമെന്ന് കേന്ദ്ര സര്‍ക്കാരിനോട് ആവശ്യപ്പെട്ടിട്ടുണ്ട്.
പ്രതികരിക്കാൻ ഇവിടെ എഴുതുക: