മുംബൈ: 2011 ക്രിക്കറ്റ് ലോകകപ്പ് കിരീടം നേടിയതിന് ശേഷമുള്ള വിക്ടറി ലാപ് പോലെ സന്തോഷം തന്ന നിമിഷങ്ങള്‍ തന്റെ ജീവിതത്തില്‍ ഉണ്ടായിട്ടില്ലെന്ന് സച്ചിന്‍ ടെന്‍ഡുല്‍ക്കര്‍. ജീവിതത്തിലെ ഏറ്റവും വലിയ അവിസ്മരണീയ നിമിഷമായിരുന്നു അത്. 2011 ലോകകപ്പില്‍ കിരീടം ചൂടിയത് പോലെയൊരു നിമിഷം തന്റെ ജീവിതത്തില്‍ ഇനി ഉണ്ടാവില്ലെന്നും സച്ചിന്‍ കൂട്ടിച്ചേര്‍ത്തു.
തന്റെ 47മത്തെ ജന്മദിനവുമായി ബന്ധപ്പെട്ട ഐ.സി.സിയുടെ ഇന്‍സ്റ്റാഗ്രാം പേജില്‍ ഷെയര്‍ ചെയ്ത വിഡിയോയിലാണ് തന്റെ ജീവിതത്തിലെ ഏറ്റവും മനോഹരമായ നിമിഷത്തെ കുറിച്ച് സച്ചിന്‍ മനസ്സ് തുറന്നത്. തന്റെ കരിയറിന്റെ അവസാന ഘട്ടത്തില്‍ താന്‍ കളി പഠിച്ച മുംബൈയിലെ വാങ്കഡെ സ്റ്റേഡിയത്തില്‍ വെച്ചാണ് ഇന്ത്യ ലോകകപ്പ് കിരീടം ഉയര്‍ത്തിയത്.
താന്‍ ക്രിക്കറ്റില്‍ അരങ്ങേറ്റം നടത്തിയ ദിവസം വളരെ മികച്ചതായിരുന്നുവെന്നും എന്നാല്‍ 2011ലെ കിരീടം വിജയം അതിനെല്ലാം മുകളിലായിരുന്നുവെന്നും സച്ചിന്‍ പറഞ്ഞു. അന്ന് ഇന്ത്യ കിരീടം നേടിയപ്പോള്‍ ഒരു രാജ്യം മുഴുവന്‍ ആഘോഷിക്കുകയായിരുന്നുവെന്നും ഒരു രാജ്യം ഒരുമിച്ച് ഇങ്ങനെ ആഘോഷിക്കുന്നത് വളരെ വിരളമായി മാത്രം കാണുന്ന കാഴ്ചയായിരുന്നുവെന്നും സച്ചിന്‍ പറഞ്ഞു.
പ്രതികരിക്കാൻ ഇവിടെ എഴുതുക: