തിരുവനന്തപുരം: മഹാരാഷ്ട്രയിലെ പല്ഘാറില് വെച്ച് രണ്ട് സന്യാസി ശ്രേഷ്ഠന്മാരെയും ഡ്രൈവറേയും അതിനിഷ്ഠൂരമായി ആള്ക്കൂട്ടം കൊല ചെയ്ത സംഭവത്തില് ദുരൂഹതയുണ്ടെന്ന് മിസോറാം മുന് ഗവര്ണര് കുമ്മനം രാജശേഖരന്.
ത്രയംബകേശ്വര് ജൂന അഖാഡയിലെ സന്യാസി വര്യന്മാരാണ് കൊല്ലപ്പെട്ടത്. ഗുരുവിന്റെ സമാധി ചടങ്ങില് പങ്കെടുക്കാന് അതിര്ത്തി പ്രദേശമായ നന്ദൂര്ബാഗിലേക്ക് പോകുകയായിരുന്ന നിരപരാധികളും നിരുപദ്രവകാരികളും നിരായുധരുമായ ഇവരെ 200ല് പരം പേര് പോലീസിന്റെ സാന്നിധ്യത്തില് ആയുധങ്ങളുമായി വന്ന് അടിച്ചും തല്ലിച്ചതച്ചുമാണ് വധിച്ചത്. സിപിഎമ്മിന്റെയും മാവോയിസ്റ്റുകളുടെയും സ്വാധീന മേഖലയാണ് അക്രമ സംഭവം നടന്ന സ്ഥലമെന്നും കുമ്മനം വ്യക്തമാക്കി.
ഇതൊരു യാദൃശ്ചിക, ആകസ്മിക സംഭവമാണോ അതുവഴി പോയ മറ്റു വാഹനങ്ങള് എന്തുകൊണ്ട് തടഞ്ഞില്ല, യാത്രക്കാരെ മര്ദ്ദിച്ചില്ല, പോലീസ് എന്തുകൊണ്ട് നോക്കിനിന്നു, കൊറോണ ലോക്ക് ഡൗണ് ഉള്ളപ്പോള് 200 ല് പരം പേര് എങ്ങനെ സംഘടിച്ച് റോഡില് നിന്നു, വ്യാഴാഴ്ച ഉണ്ടായ സംഭവം എന്തുകൊണ്ട് തിങ്കളാഴ്ച മാത്രം പുറത്തു വന്നു, മാധ്യമങ്ങളില് എന്തുകൊണ്ട് വര്ത്തയായില്ലെന്ന സംശയങ്ങളോടെയുള്ള ചോദ്യങ്ങളും കുമ്മനം ഫെയ്സ്ബുക്കിലൂടെ ചോദിക്കുന്നു.
ഫെയ്സ്ബുക്ക് പോസ്റ്റിന്റെ പൂര്ണരൂപം:
മഹാരാഷ്ട്രയിലെ പല്ഘാറില് വെച്ചു 2 സന്യാസി ശ്രേഷ്ഠന്മാരെയും ഡ്രൈവറേയും അതിനിഷ്ഠൂരമായി ആള്ക്കൂട്ടം കൊല ചെയ്ത സംഭവം മനുഷ്യ മന:സാക്ഷിയെ ഞെട്ടിപ്പിച്ചു.
നിരപരാധികളും നിരുപദ്രവകാരികളും നിരായുധരുമായ ഇവരെ 200 ല് പരം പേര് പോലീസിന്റെ സാന്നിധ്യത്തില് ആയുധങ്ങളുമായി വന്ന് അടിച്ചും തല്ലിച്ചതച്ചുമാണ് വധിച്ചത്.
ത്രയംബകേശ്വര് ജൂന അഖാഡയിലെ സന്യാസി വര്യന്മാരായിരുന്നു ഇവര്. ഗുരുവിന്റെ സമാധി ചടങ്ങില് പങ്കെടുക്കാന് അതിര്ത്തി പ്രദേശമായ നന്ദൂര്ബാഗിലേക്ക് പോകുകയായിരുന്നു. സിപിഎമ്മിന്റെയും മാവോയിസ്റ്റുകളുടെയും സ്വാധീന മേഖലയാണ് അക്രമ സംഭവം നടന്ന സ്ഥലം.
വന്ദ്യവയോധികനായ കാഷായ വസ്ത്രധാരിയെ തലങ്ങും വിലങ്ങും ആളുകള് ദീര്ഘനേരം നിന്ദ്യവും നീചവുമായി മര്ദ്ദിക്കുന്നതും പ്രാണരക്ഷാര്ത്ഥം മുന്നോട്ട് നീങ്ങുമ്പോള് ദേഹമാസകലം ആയുധങ്ങള് കൊണ്ട് അടിച്ചും ഇടിച്ചും നിലത്തു വീഴ്ത്തുന്നതും പിടയുന്നതും അവരെ മരിച്ചുവെന്ന് ഉറപ്പാക്കും വരെ പ്രഹരിക്കുന്നതും ദൃശ്യങ്ങളില് കാണാം.
ഇതൊരു യാദൃശ്ചിക , ആകസ്മിക സംഭവമാണോ ?? അതുവഴി പോയ മറ്റു വാഹനങ്ങള് എന്തുകൊണ്ട് തടഞ്ഞില്ല ?? യാത്രക്കാരെ മര്ദ്ദിച്ചില്ല ?? പോലീസ് എന്തുകൊണ്ട് നോക്കിനിന്നു ? കൊറോണ ലോക്ക് ഡൗണ് ഉള്ളപ്പോള് 200 ല് പരം പേര് എങ്ങനെ സംഘടിച്ച് റോഡില് നിന്നു ? വ്യാഴാഴ്ച ഉണ്ടായ സംഭവം എന്തുകൊണ്ട് തിങ്കളാഴ്ച മാത്രം പുറത്തു വന്നു ?? മാധ്യമങ്ങളില് എന്തുകൊണ്ട് വര്ത്തയായില്ല. ??
ഉത്തര് പ്രദേശില് പശു മോഷണത്തിന്റെ പേരില് അഖ്ലാഖിനേയും , സീറ്റ് തര്ക്കത്തിന്റെ പേരില് , ട്രെയിനില് ജുനൈദിനെയും ആള്കൂട്ടം കൊല ചെയ്തപ്പോള് ശബ്ദിച്ചവരും നഷ്ടപരിഹാരം നല്കിയവരും ഇപ്പോള് എന്തേ മിണ്ടുന്നില്ല ??
ഒട്ടേറെ ചോദ്യങ്ങള് ബാക്കി നില്ക്കുന്നു. ധര്മ്മ ഭൂമിയായ ഭാരതത്തില് ധര്മ്മ ഗുരുക്കന്മാരുടെ രക്ത തുള്ളികള് വീഴുന്നതും അടിയും ഇടിയും കൊണ്ട് പിടഞ്ഞു വീണു മരിക്കുന്നതും വേദനയോടെ നാം നോക്കി കാണുന്നു. ധര്മ്മ സ്നേഹികളായ നാം ശക്തമായി പ്രതിഷേധിക്കണം.
കൊറോണക്കെതിരെ ലോക്ക് ഡൗണില് കഴിയുമ്പോഴും നമ്മുടെ ഹൃദയം അവര്ക്ക് വേണ്ടി തുടിയ്ക്കട്ടെ. ധര്മ്മത്തിന് വേണ്ടി വീര മൃത്യു വരിച്ച ബലിദാനികളായ ആ മഹാത്മാക്കളുടെ വീര സ്മരണയ്ക്ക് മുന്പില് അനന്തകോടി പ്രണാമം
