ആലപ്പുഴ കൊവിഡ് മുക്തമാകുന്നു, രോഗം ഭേദമായ രണ്ട് പേർ കൂടി ആശുപത്രി വിടുന്നു

ആലപ്പുഴ: ജില്ലയില്‍ കൊവിഡ് സ്ഥിരീകരിച്ച്‌ ചികിത്സയിലുളള രണ്ടുപേരുടെ കൂടി പരിശോധനാ ഫലങ്ങള്‍ നെഗറ്റീവായി. മൂന്നാം തവണയും പരിശോധനയ്‌ക്ക് അയച്ച സ്രവ സാമ്പിളുകളുടെ ഫലമാണ് പുറത്തുവന്നത്. മൂന്നു തവണയും പരിശോധനാഫലം നെഗറ്റീവായതോടെ ഇരുവരും ഇന്ന് ആശുപത്രി വിട്ടേക്കും. ഇതോടെ ജില്ല കോവിഡ് മുക്തമാകും.

ഇരുവരും ആശുപത്രി വിടുന്നതോടെ, സംസ്ഥാനത്ത് കൊവിഡ് ബാധിച്ച്‌ ചികിത്സയിലുളളവരുടെ എണ്ണം 127 ആകും. നിലവില്‍ 270 പേര്‍ രോഗമുക്തരായിട്ടുണ്ട്. ഇതുവരെ 401 പേര്‍ക്കാണ് സംസ്ഥാനത്ത് രോഗം സ്ഥിരീകരിച്ചത്. 55,590 പേരാണ് നിരീക്ഷണത്തിലുള്ളത്. 55,129 പേര്‍ വീടുകളിലും 461 പേര്‍ ആശുപത്രികളിലുമാണ്. ഇന്നലെ മാത്രം 72 പേരെ ആശുപത്രിയില്‍ പ്രവേശിപ്പിച്ചു. ഇതുവരെ 19,351 സാമ്ബിളുകളാണ് പരിശോധനയ്‌ക്ക് അയച്ചത്.18,547 എണ്ണം രോഗബാധ ഇല്ല എന്നുറപ്പാക്കിയിട്ടുണ്ട്.

സംസ്ഥാനത്ത് ഇന്നലെ 2 പേര്‍ക്കാണ് കോവിഡ് 19 സ്ഥിരീകരിച്ചത്. കണ്ണൂര്‍, കാസര്‍കോട് ജില്ലകളില്‍ ഓരോരുത്തര്‍ക്കാണ് രോഗം കണ്ടെത്തിയത്. രണ്ടുപേരും വിദേശത്തുനിന്ന് വന്നവരാണ്.