കൊച്ചി: കൊറോണ രോഗവ്യാപനമുണ്ടായാല് ജില്ലയില് അടിയന്തരമായി നടപ്പാക്കുന്ന സമഗ്രപദ്ധതിയുടെ ആദ്യഘട്ട മോക്ഡ്രില് വിജയം. പഞ്ചായത്തുകളില് ഹാളുകളിലും സ്കൂളുകളിലുമായി ക്രമീകരിക്കുന്ന ഫസ്റ്റ് ലൈന് ട്രീറ്റ്മെന്റ് സെന്ററുകളിലേക്ക് വീടുകളില് നിന്ന് രോഗികളെ എത്തിച്ച് ചികിത്സയില് പ്രവേശിപ്പിക്കുന്നതിന്റെ മോക്ഡ്രില്ലാണ് നടത്തിയത്.
ചേരാനല്ലൂര് പഞ്ചായത്തിലെ പാരിഷ് ഹാളില് സജ്ജമാക്കിയ ഫസ്റ്റ് ലൈന് ട്രീറ്റ്മെന്റ് സെന്റര്, ഐഎംഎ ഹൗസിലെ വാര് റൂം, പ്രാഥമികാരോഗ്യ കേന്ദ്രങ്ങള് എന്നിവയെ കോര്ത്തിണക്കിയായിരുന്നു മോക്ഡ്രില്. ചേരാനല്ലൂരിലെ മാതൃകയില് ജില്ലയിലെ വിവിധ പഞ്ചായത്തുകളിലും നഗരസഭകളിലും ഫസ്റ്റ് ലൈന് ട്രീറ്റ്മെന്റ് സെന്ററുകള് സജ്ജമാക്കി വരികയാണ്.
ജില്ലയില് പൊതു, സ്വകാര്യ മേഖലയിലുള്ള ആശുപത്രികള്, ആംബുലന്സുകള്, അനുബന്ധ ചികിത്സാ സംവിധാനങ്ങള്, സന്നദ്ധപ്രവര്ത്തകര് എന്നിവയടക്കമുള്ള വിവരങ്ങള് സമാഹരിച്ച് തയാറാക്കിയ വെബ് ആപ്ലിക്കേഷന് വഴിയാണ് മോക്ഡ്രില് ഏകോപിപ്പിച്ചത്. രോഗവിവരം ലഭിച്ചാലുടന് സ്ഥലത്തെത്തി കൊറോണ പ്രോട്ടോകോള് പാലിച്ച് രോഗിയെ സുരക്ഷിതമായി ഫസ്റ്റ് ലൈന് ട്രീറ്റ്മെന്റ് സെന്ററിലാക്കുന്ന പ്രവര്ത്തനം നിശ്ചിത സമയത്തിനുള്ളില് പൂര്ത്തീകരിക്കാനാകുമെന്ന് മോക്ക് ഡ്രില്ലില് വ്യക്തമായി.
പ്രാഥമികരോഗലക്ഷണമുള്ള രോഗിയെ അടിയന്തരമായി ഫസ്റ്റ് ലൈന് ട്രീറ്റ്മെന്റ് സെന്ററിലെത്തിക്കുന്നതിന് പ്രത്യേകമായി ഇരട്ട ചേംബര് ഓട്ടോറിക്ഷ സജ്ജമാക്കിയായിരുന്നു മോക്ഡ്രില്. പാസഞ്ചര് കംപാര്ട്ട്മെന്റിനെ ഡ്രൈവര് കാബിനില് നിന്നും പ്ലാസ്റ്റിക് സ്ക്രീന് മുഖേന വേര്തിരിച്ചാണ് ഓട്ടോറിക്ഷ ആംബുലന്സ് സജ്ജമാക്കിയത്. കുറച്ചു കൂടി ഗുരുതരനിലയിലുള്ള രോഗിക്കായി ആംബുലന്സാണ് അയച്ചത്. ഫസ്റ്റ് ലൈന് ട്രീറ്റ്മെന്റ് സെന്ററില് നിന്ന് ആശുപത്രിയിലേക്ക് രോഗിയെ മാറ്റുന്നതിനും പ്രത്യേക ആംബുലന്സ് ഏര്പ്പെടുത്തിയിരുന്നു,
മാസ്ക്, ഗ്ലൗസ്, പഴ്സണല് പ്രൊട്ടക്ഷന് എക്വിപ്മെന്റ് എന്നിവയുടെ ഉപയോഗം ഉറപ്പു വരുത്തുകയും വിവിധ സംവിധാനങ്ങള് തമ്മിലുള്ള ഏകോപനത്തിലെ പിഴവുകള് പരിഹരിക്കുകയുമായിരുന്നു മോക്ഡ്രില്ലിന്റെ ലക്ഷ്യം. ജില്ലാ ഭരണകൂടം, ആരോഗ്യ വകുപ്പ്, ദേശീയാരോഗ്യദൗത്യം, ഇന്ത്യന് മെഡിക്കല് അസോസിയേഷന് കൊച്ചി ശാഖ, മോട്ടോര് വാഹന വകുപ്പ് (ആര്ടിഒ) സന്നദ്ധപ്രവര്ത്തകര് എന്നിവര് സംയുക്തമായാണ് മോക്ഡ്രില് ആവിഷ്കരിച്ചത്.
