കൊച്ചി: തൃപ്പൂണിത്തുറ ശ്രീപൂര്‍ണ്ണത്രയീശ ഭഗവാന്റെ നിത്യശീവേലിക്കായി എത്തിയ ദേവസ്വം ആന സീതാരാമനും പാപ്പാന്മാരായ കണ്ണന്‍, ബാബു, ബിജു, രഞ്ജിത് എന്നിവര്‍ക്കും സ്വാന്ത്വനമേകി തൃപ്പൂണിത്തുറ സേവാഭാരതി. സന്നദ്ധ പ്രവര്‍ത്തകരുടേയും അഭ്യുദയകാംക്ഷികളുടേയും വീടുകളില്‍ തയ്യാറാക്കുന്ന ഭക്ഷണമാണ് സേവാഭാരതി അവര്‍ക്ക് നല്‍കുന്നത്.
ഇവരെക്കൂടാതെ രാവിലെയും ഉച്ചയ്‌ക്കുമായി അമ്പതോളം പേര്‍ക്കാണ് നഗരത്തിന്റെ വിവിധ ഇടങ്ങളിലായി സേവാഭാരതി ഭക്ഷണം വിതരണം ചെയ്യുന്നത്. ലോക്ഡൗണിന്റെ തുടക്കം മുതല്‍ നിര്‍ധനരായവര്‍ക്ക് പലവ്യഞ്ജന കിറ്റുകള്‍ നല്കി.
വിഷു പ്രമാണിച്ച് എണ്ണൂറോളം പച്ചക്കറി കിറ്റുകള്‍ നഗരത്തിലെ വിവിധ കേന്ദ്രങ്ങളിലും എസ് എംപി, പാമ്പാടിത്താഴം, പൊയ്ന്തറ എന്നീ കോളനികളിലും സേവാഭാരതി വിഷുക്കിറ്റ് വിതരണം ചെയ്തു. ഡോ. അംബേദ്കര്‍ ജയന്തിയായ വിഷുദിനത്തിലും പ്രവര്‍ത്തകര്‍ സേവന സന്നദ്ധരായിരുന്നു. കൂടാതെ മെഡിക്കല്‍ സേവനങ്ങളും കൗണ്‍സലിങ്, കണ്‍സള്‍ട്ടന്‍സി സേവനങ്ങളും നല്‍കുന്നതിന് സേവാ പ്രമുഖ് എന്‍. വാസുദേവന്റേയും നഗര്‍ സംഘചാലക് പി.കെ. പീതാംബരന്റേയും നേതൃത്വത്തിലുള്ള യൂണിറ്റ് സുസജ്ജമാണ്.
പ്രതികരിക്കാൻ ഇവിടെ എഴുതുക: