മുംബൈ: കൊറോണ പ്രതിരോധ പ്രവര്ത്തനങ്ങള്ക്കായി പണം കണ്ടെത്താന് ഇന്ത്യ-പാകിസ്ഥാന് ക്രിക്കറ്റ് പരമ്പര നടത്തണമെന്ന നിര്ദേശിച്ച പാക് മുന് ഫാസ്റ്റ് ബൗളര് ഷുഐബ് അക്തറിന് മറുപടിയുമായി ക്രിക്കറ്റ് ഇതിഹാസം സുനില് ഗവാസ്കര്. അക്തറിന്റെ നിര്ദേശം ഒരിക്കലും നടക്കാന് പോവുന്നില്ല. ലാഹോറില് മഞ്ഞുവീഴ്ചയുണ്ടായെക്കാം പക്ഷേ ഇതുമാത്രം നടക്കില്ലെന്ന് അദ്ദേഹം വ്യകത്മാക്കി.
കഴിഞ്ഞ ദിവസം അക്തറിന് സമാനമായ മറുപടിയുമായി കപില്ദേവ് രംഗത്തെത്തിയിരുന്നു. കോവിഡ് രോഗ ബാധയെ തുടര്ന്ന് ഇരു രാജ്യങ്ങളും നേരിടുന്ന സാമ്പത്തിക പ്രതിസന്ധി മറികടക്കാന് ഇരു രാജ്യങ്ങളും തമ്മില് മൂന്നു മത്സര ഏകദിന പരമ്പര കളിക്കാമെന്നായിരുന്നു അക്തറിന്റെ ആശയം. അടച്ചിട്ട സ്റ്റേഡിയത്തില് മത്സരം നടത്താമെന്നും മത്സരത്തില് നിന്നും ലഭിക്കുന്ന വരുമാനം തുല്യമായി പങ്കുവയ്ക്കാമെന്നുമായിരുന്നു അക്തറിന്റെ നിര്ദേശം. എന്നാല് ഇന്ത്യയ്ക്ക് ക്രിക്കറ്റ് നടത്തി ഇപ്പോള് പണമുണ്ടാക്കേണ്ട ആവശ്യമില്ലെന്ന് കപില്ദേവ് പറഞ്ഞു.
ഇരുടീമുകളും തമ്മില് ലോകകപ്പുകളിലും ഐസിസി ടൂര്ണമെന്റുകളിലും മാത്രമേ തുടര്ന്നും കളിക്കുകയുള്ളൂ. നിലവില് ഐസിസി ടൂര്ണമെന്റുകളിലും ഏഷ്യാ കപ്പിലും മാത്രമേ ഇന്ത്യയും പാകിസ്ഥാനും തമ്മില് മുഖാമുഖം വരാറുള്ളൂ. കഴിഞ്ഞ വര്ഷം ഇംഗ്ലണ്ടില് നടന്ന ഏകദിന ലോകകപ്പിന്റെ പ്രാഥമിക റൗണ്ടിലാണ് അവസാനമായി ഇന്ത്യ- പാക് പോരാട്ടം കണ്ടത്. മല്സരത്തില് ഇന്ത്യ മികച്ച വിജയം കൊയ്യുകയും ചെയ്തിരുന്നു.
നേരത്തെ പ്രതിരോധ പ്രവര്ത്തനങ്ങള്ക്കായി ബിസിസിഐ 51 കോടി രൂപ പ്രധാനമന്ത്രി കെയേഴ്സ് ഫണ്ടിലേക്ക് നല്കിയിരുന്നു. ആവശ്യമെങ്കില് ഇനിയും കൂടുതല് നല്കാന് ബി.സി.സി.ഐയ്ക്ക് സാധിക്കും. അതുകൊണ്ടുതന്നെ ഇനി ക്രിക്കറ്റ് മത്സരം നടത്തി ഫണ്ട് കണ്ടെത്തേണ്ട ആവശ്യമില്ലെന്നും അദ്ദേഹം പറഞ്ഞു. ആളുകളുടെ ജീവന് രക്ഷിക്കുന്നതിനും രോഗബാധ കാരണം ദുരിതമനുഭവിക്കുന്ന പാവപ്പെട്ട ജനങ്ങളെ സംരക്ഷിക്കുന്നതിനുമാകണം ഇപ്പോഴത്തെ സാഹചര്യത്തില് പ്രാധാന്യം നല്കേണ്ടതെന്നും കപില് വ്യക്തമാക്കി.
