ആലപ്പുഴ: രാജ്യതലസ്ഥാനത്തിനടുത്തുനിന്നു മൂവായിരത്തിലേറെ കിലോമീറ്റര്‍ സഞ്ചരിച്ച് സ്വന്തം നാടായ ഹരിപ്പാടെത്തിയതിന്റെ ആശ്വാസത്തിലാണ് ഗര്‍ഭിണിയായ യുവതിയും, ഭര്‍ത്താവും. പല്ലന പുത്തന്‍വീട്ടില്‍ പടീറ്റതില്‍ യു. വിഷ്ണുവും വൃന്ദയുമാണ് ആംബുലന്‍സില്‍ 52 മണിക്കൂറിലധികം യാത്ര ചെയ്ത് ആശ്വാസ തീരമണഞ്ഞത്. ഗര്‍ഭിണിയായ വൃന്ദയ്‌ക്കു ഡോക്ടര്‍ പൂര്‍ണവിശ്രമം നിര്‍ദേശിച്ചപ്പോഴാണു ദല്‍ഹിക്കു സമീപം യുപി അതിര്‍ത്തി പ്രദേശമായ ഗാസിയാബാദില്‍നിന്ന് ഇവരെ നാട്ടിലെത്തിച്ചത്. തിങ്കളാഴ്ച രാവിലെ 11ന് പുറപ്പെട്ട് കഴിഞ്ഞ ദിവസം ഉച്ചയ്‌ക്കു നാട്ടിലെത്തി. ഹരിപ്പാട് താലൂക്ക് ആശുപത്രിയിലെത്തി വൈദ്യപരിശോധനയ്‌ക്ക് ശേഷം പല്ലനയിലെ വീട്ടിലേക്ക് മടങ്ങി. ആരോഗ്യവകുപ്പിന്റെ നിര്‍ദേശപ്രകാരം ഇനി രണ്ടാഴ്ചക്കാലം വീട്ടില്‍ നിരീക്ഷണത്തിലാണ് ഇരുവരും.
വിഷ്ണുവും വൃന്ദയും ദല്‍ഹിയില്‍ കോള്‍ സെന്റര്‍ ജീവനക്കാരാണ്. ഒരു മാസം മുന്‍പാണ് വൃന്ദ ഗര്‍ഭിണിയാണെന്നു മനസിലായത്. ലോക്ഡൗണിനിടെ ഭക്ഷണവും മരുന്നും വാങ്ങാന്‍ പുറത്തേക്കിറങ്ങിയ വിഷ്ണുവിന് പോലീസിന്റെ മര്‍ദനവുമേല്‍ക്കേണ്ടി വന്നു. നാട്ടിലെത്താനുള്ള വഴി തേടിയപ്പോള്‍ യാത്രയ്‌ക്കുള്ള ആംബുലന്‍സും വൈദ്യസഹായവും നല്‍കാമെന്ന് ആശുപത്രി അധികൃതര്‍ അറിയിച്ചു. അതിനാവശ്യമായ 1.20 ലക്ഷം രൂപയ്‌ക്കു നെട്ടോട്ടമായി. മത്സ്യത്തൊഴിലാളിയായ അച്ഛന്‍ ഉണ്ണിയും തൊഴിലുറപ്പ് തൊഴിലാളിയായ അമ്മ ശോഭയും ബന്ധുക്കളും ചേര്‍ന്നു കുറച്ചു തുക കണ്ടെത്തി. ബാക്കി തുക നാട്ടുകാരും ജനപ്രതിനിധികളും ചേര്‍ന്ന് സമാഹരിച്ച് നല്‍കി.
പ്രതികരിക്കാൻ ഇവിടെ എഴുതുക: