തിരുവനന്തപുരം: തദ്ദേശ സ്ഥാപനങ്ങളിലെ പൊതുതിരഞ്ഞെടുപ്പിനുള്ള വോട്ടര് പട്ടിക സംസ്ഥാനത്ത് ഏര്പ്പെടുത്തിയിട്ടുള്ള ലോക്ഡൗണ് അവസാനിക്കുന്ന മുറയ്ക്ക് പ്രസിദ്ധീകരിക്കുമെന്ന് സംസ്ഥാന തെരഞ്ഞെടുപ്പ് കമ്മീഷണര് വി. ഭാസ്കരന് അറിയിച്ചു.
മട്ടന്നൂര് നഗരസഭ ഒഴികെയുള്ള തദ്ദേശ സ്വയംഭരണ സ്ഥാപനങ്ങളില് കാലാവധി അവസാനിക്കുന്ന നവംബര് 11ന് മുമ്പ് പൊതുതെരഞ്ഞെടുപ്പ് നടത്തുന്നതിനുള്ള നടപടികളാണ് കമ്മീഷന് സ്വീകരിച്ചുവരുന്നത്. ഇതിന്റെ ഭാഗമായുള്ള വോട്ടര് പട്ടിക തയാറാക്കുന്ന പ്രവര്ത്തനങ്ങള് ഏറെക്കുറെ പൂര്ത്തിയാക്കിയിട്ടുണ്ട്. മാര്ച്ച് 27ന് അന്തിമ പട്ടിക പ്രസിദ്ധീകരിക്കുവാനാണ് കമ്മീഷന് നിശ്ചയിച്ചിരുന്നത്.
എന്നാല് സംസ്ഥാനത്ത് കൊറോണ വ്യാപനം തടയുന്നതിന് ലോക്ഡൗണ് പ്രഖ്യാപിച്ച സാഹചര്യത്തില് പട്ടിക പ്രസിദ്ധീകരിക്കുന്നതു സംബന്ധിച്ച തുടര് നടപടികള് നിര്ത്തിവെയ്ക്കാന് കമ്മീഷണര് ഇലക്ട്രറല് രജിസ്ട്രേഷന് ഓഫീസര്മാര്ക്ക് നിര്ദേശം നല്കിയിരുന്നു.
കേന്ദ്ര സര്ക്കാര് ഏപ്രില് 14 വരെയാണ് നിലവില് ലോക്ഡൗണ് പ്രഖ്യാപിച്ചിട്ടുള്ളത്. ഇത് അവസാനിക്കുന്നമുറയ്ക്ക് സ്ഥിതി വിലയിരുത്തി പട്ടിക പ്രസിദ്ധീകരണത്തിനുള്ള തുടര്പ്രവര്ത്തനങ്ങള് ആരംഭിക്കും. വോട്ടര് പട്ടിക പ്രസിദ്ധീകരിച്ചതിനുശേഷവും പേര് ചേര്ക്കുന്നതിനും ആക്ഷേപങ്ങള് സമര്പ്പിക്കുന്നതിനും രണ്ട് അവസരങ്ങള് കൂടി നല്കുന്നതാണ്.
വാര്ഡ് വിഭജനത്തിന് ശേഷവും തെരഞ്ഞെടുപ്പിന് തൊട്ടുമുമ്പുമാണ് ഈ അവസരങ്ങള് നല്കുക. അപ്പോള് ലഭിക്കുന്ന അപേക്ഷകള് കൂടി പരിഗണിച്ചതിനുശേഷമായിരിക്കും തെരഞ്ഞെടുപ്പിനുള്ള വോട്ടര് പട്ടിക തയാറാക്കുക.
