എനിക്കെന്ത് ലോക് ഡൗൺ: സദ്യ ഉണ്ട് രാജു ഏബ്രഹാം എംഎൽഎ

പത്തനംതിട്ട: കോവിഡ് 19 മഹാമാരിയെ പ്രധിരോധിക്കാൻ ഭാരതം മുഴുവൻ ലോക് ഡൗണിൽ മുഴുകി കരുതലോടെ നീങ്ങുമ്പോൾ ലോക് ഡൗൺ വ്യവസ്ഥകൾ ലംഘിച്ച് റാന്നി എംഎൽഎ രാജു ഏബ്രഹാം. കേന്ദ്ര – സംസ്ഥാന സർക്കാരുകളുടെ ശക്തമായ നിബന്ധനകളും നിർദ്ദേശങ്ങളും കാറ്റിൽ പറത്തിയാണ് റാന്നി എംഎൽഎ രാജു ഏബ്രഹാം നിരവധി പേരോടൊപ്പം ഇരുന്ന് ഇന്നലെ ഭക്ഷണം കഴിച്ച് ലോക്ഡൗൺ ആഘോഷമാക്കിയത്. പുറത്തിറങ്ങാൻ പറ്റാതെയിരിക്കുന്നവർക്ക് എത്തിക്കാൻവേണ്ടി തയ്യാറാക്കിയ ഭക്ഷണമാണ് എം എൽ എയും സംഘവും കഴിച്ച് സ്ഥലംവിട്ടത്.

പഞ്ചായത്ത് അംഗങ്ങളെയും ജീവനക്കാരെയും ഒന്നിച്ചിരുത്തി ഭക്ഷണം വിളമ്പി ഫോട്ടോ എടുത്ത് സോഷ്യൽ മീഡിയയിലൂടെ സ്വന്തം പേജ് വഴി പ്രചരിപ്പിക്കുകയും ചെയ്തിട്ടുണ്ട്.  വിളമ്പിയ സദ്യയാകട്ടെ പെരുനാട് കമ്യൂണിറ്റി കിച്ചണിൽ നിന്നെത്തിച്ചതും.  

കമ്മ്യൂണിറ്റി കിച്ചണിൽ തയ്യാറാക്കുന്ന ഭക്ഷണം പൊതികളായി മാത്രമേ പുറത്തു കൊണ്ടു പോകാൻ വ്യവസ്ഥയുള്ളൂ. വീടിന് പുറത്ത് കൂട്ടം കൂടിയിരുന്ന് ഭക്ഷണം കഴിക്കുന്നതും കൊറോണാ വ്യാപന സാധ്യതാ കാലത്ത് അനുവദനീയമല്ല. കടകളിൽനിന്ന് ചായയോ, വെള്ളമോ പോലും കഴിക്കരുതെന്ന് കർശന നിർദ്ദേശം ഉള്ളപ്പോൾ് ഉത്തരവാദിത്തത്തോടെ പ്രവർത്തിക്കേണ്ട ജനപ്രതിനിധിയിൽനിന്നും പബ്‌ളിസിറ്റിക്കുവേണ്ടി ഇത്തരം പ്രവർത്തിയുണ്ടായതിൽ പരക്കെ ആക്ഷേപം ഉയർന്നിട്ടുണ്ട്.

തെരുവിൽ സാധാരണക്കാർക്ക് സ്വതന്ത്രമായി സഞ്ചരിക്കാൻ പോലും നിയമമനുവദിക്കുന്നില്ല. എം എൽ എക്കും സി പി എം അണികൾക്കും ഇത് ബാധകമല്ലെന്നാണ് നിരവധി സംഭവങ്ങൾ തെളിയിക്കുന്നത്. സി പി എം കാരെ ഉൾപ്പെടുത്തി സന്നദ്ധ സംഘം രൂപീകരിക്കുമെന്ന വാർത്ത വന്നതോടെ റാന്നി, കോന്നി മണ്ഡലങ്ങളിലെ ഡിവൈഎഫ്‌ഐ പ്രവർത്തകർ പോലീസിന്റെയും, ആരോഗ്യ വകുപ്പിന്റെയും നിർദ്ദേശങ്ങൾ പാലിക്കാതെ ഇരുചക്രവാഹനങ്ങളിൽ തലങ്ങും, വിലങ്ങും പായുകയാണ്. പുസ്തകങ്ങൾ എത്തിച്ചു കൊടുക്കുക, കടകളിൽ  സാധനം വാങ്ങി പണം വാങ്ങുക എന്നീ പ്രവർത്തനങ്ങളിൽ വ്യാപരിച്ചിരിക്കുന്നത് ഏതാണ്ട് ആയിരത്തോളം സി പി എം പ്രവത്തകരാണ്.  

എന്നാൽ ദുരന്ത മുഖങ്ങളിൽ ഇടപെടാൻ പരിശീലനം ലഭിച്ച സേവഭാരതി പ്രവർത്തകരെ ജനങ്ങളുമായി സഹകരിക്കുന്നതിൽ നിന്ന് മാറ്റി നിർത്തുന്നു. അവർക്ക് ആംബുലൻസ് ഉൾപ്പടെ ആരോഗ്യ സംവിധാനങ്ങൾ ഉള്ളവരാണ്. ഒരു മാനദണ്ഡവുമില്ലാതെ, പരിശീലനം ലഭിക്കാത്ത പാർട്ടി അണികൾ സമൂഹവുമായി അടുത്തിടപഴകുന്നത് ദൂരവ്യാപകമായ പ്രത്യാഘാതങ്ങൾക്ക് വഴിവക്കുമെന്നാണ് വിദഗ്‌ദ്ധർ പറയുന്നത്. ഇതിന് ഒരു മുതിർന്ന ഭരണകക്ഷി എംഎൽഎ തന്നെ രംഗത്തെത്തിയിരിക്കുന്നത് സർക്കാരിന്റെ ആത്മാർത്ഥതയെപ്പോലും ചോദ്യം ചെയ്യപ്പെടുന്നു.