ന്യൂദല്‍ഹി: കൊറോണ(കൊവിഡ് 19) വൈറസ് ബാധയെ പ്രതിരോധിക്കാന്‍ സാര്‍ക്ക് രാജ്യങ്ങളെ കുട കീഴിലാക്കാനും അവരുമായി ചേര്‍ന്ന് പദ്ധതി ആവിഷ്‌കരിക്കാനും എടുത്ത ഇന്ത്യയുടെ ഉദ്യമത്തെ പ്രശംസിച്ച് യുഎസ് പ്രതിരോധ സെക്രട്ടറി മാര്‍ക് എസ്‌പെര്‍. പ്രതിരോധ മന്ത്രി രാജ്‌നാഥ് സിങുമായി നടത്തിയ ടെലിഫോണ്‍ സംഭാഷണത്തിലാണ് മാര്‍ക് എസ്‌പെറിന്റെ പ്രശംസ.
ദക്ഷിണേഷ്യന്‍ രാജ്യങ്ങളില്‍ കൊറോണവൈറസ് ബാധ തടയുന്നതിനുള്ള ഗവേഷണങ്ങള്‍ ഏകോപിപ്പിക്കാന്‍ പൊതുസംവിധാനം ഏര്‍പ്പെടുത്താന്‍ മുന്‍കൈയെടുത്തതിനാണ് ഇന്ത്യയെ എസ്‌പെര്‍ പ്രശംസിച്ചത്.
കൊവിഡ് 19 മഹാമാരിയെ കുറിച്ച് ഇരുനേതാക്കളും ചര്‍ച്ച ചെയ്‌തെന്നും സാമൂഹിക സമ്പര്‍ക്കങ്ങള്‍ ഒഴിവാക്കാന്‍ ആഹ്വാനം ചെയ്‌തെന്നും പെന്റഗണ്‍ അറിയിച്ചു. നിലവിലുള്ള പ്രാദേശിക സഹകരണവും സൈന്യത്തിലെ സൈനിക ഇടപെടലും പ്രതിരോധ വ്യാപാരം വര്‍ദ്ധിപ്പിക്കുന്നതിനുള്ള സംരംഭങ്ങളും ഉള്‍പ്പെടെ പ്രതിരോധ മുന്‍ഗണനകളെ സംബന്ധിച്ചും ചര്‍ച്ച ചെയ്തതായി പെന്റഗണ്‍ കൂട്ടിച്ചേര്‍ത്തു.
അതേസമയം കൊറോണ വൈറസ് പ്രതിസന്ധിയെ തുടര്‍ന്ന് നേരത്തെ നിശ്ചയിച്ചിരുന്ന എസ്‌പെറിന്റെ ഇന്ത്യാ സന്ദര്‍ശനം മാറ്റിവെച്ചിരുന്നു.
പ്രതികരിക്കാൻ ഇവിടെ എഴുതുക: