കോഴിക്കോട്: കേരളത്തില്‍ വീണ്ടും മുത്തലാഖ്. ഫോണിലൂടെ മുത്തലാഖ് ചൊല്ലി വിവാഹ ബന്ധം ഒഴിവാക്കിയെന്ന് ആരോപിച്ച് യുവതി ഭര്‍ത്താവിനെതിരെ പരാതി നല്‍കി. കോഴിക്കോട് കോയിലാണ്ടി സ്വദേശിനി ഫഹ്മിദയാണ് ഭര്‍ത്താവിനെതിരെ പോലീസില്‍ പരാതി നല്‍കിയത്.
രണ്ടര വര്‍ഷം മുമ്പാണ് കൊയിലാണ്ടി പെരുവട്ടൂര്‍ സ്വദേശിയായ ഫഹ്മിദ വടകര ഓര്‍ക്കാട്ടേരി സ്വദേശിയായ സെയ്ദ് ഹാഷിം ഫവാസ് കോയ തങ്ങളെ വിവാഹം ചെയ്തത്. ഇരുവരുടേതും രണ്ടാം വിവാഹമാണ്. ഒരു വര്‍ഷത്തിന് ശേഷം ഫവാസ് വിദേശത്തേക്ക് പോയതോടെ ഭര്‍തൃപിതാവ് തന്നെ ശാരീരികമായി പീഡിപ്പിച്ചതായും ഫഹ്മിദയുടെ പരാതിയില്‍ ആരോപിക്കുന്നുണ്ട്. സ്ത്രീധനത്തിന്റെ പേരില്‍ ഭര്‍തൃമാതാവും ഉപദ്രവിച്ചിരുന്നു. ഇതുസംബന്ധിച്ച് ഭര്‍ത്താവിന പലവിധത്തില്‍ അറിയിച്ചിട്ടും വീട്ടില്‍ തന്നെ തുടരാനാണ് ഫവാസ് ഫഹ്മിദയ്‌ക്ക് നിര്‍ദ്ദേശം നല്‍കിയത്.
ഭര്‍തൃമാതാവിന്റേയും പിതാവില്‍ നിന്നുമുള്ള പീഡനങ്ങള്‍ സഹിച്ച് അവിടെ തുടരാനാവില്ലെന്ന് അറിയിച്ചതോടെ ഫവാസ് ഫോണ്‍ വിളിച്ച് മുത്തലാഖ് ചൊല്ലുകയായിരുന്നു. തുടര്‍ന്ന് ഇരുവരും തമ്മിലുള്ള വിവാഹ ബന്ധം വേര്‍പ്പെടുത്തുന്നതായും ഇയാള്‍ അറിയിച്ചെന്നും ഫഹ്മിദ പറഞ്ഞു.
പരാതിയുടെ അടിസ്ഥാനത്തില്‍ കൊയിലാണ്ടി പോലീസ് കേസെടുത്ത് അന്വേഷണം ആരംഭിച്ചു. ഫവാസിനും, ഇയാളുടെ മാതാവിനും പിതാവിനുമെതിരെ ഗാര്‍ഹിക പീഡനം ഉള്‍പ്പടെയുള്ള വകുപ്പുകള്‍ ചുമത്തിയാണ് കേസെടുത്തിരിക്കുന്നത്.
പ്രതികരിക്കാൻ ഇവിടെ എഴുതുക: