ലങ്കയ്‌ക്ക് വിജയത്തുടക്കം ; കംഗാരുപ്പടയെ പിടിച്ചുകെട്ടി സിംഹളപ്പട

മുംബൈ: : റോഡ് സേഫ്റ്റി വേൾഡ് സീരീസ് ട്വന്‍റി 20യിൽ ശ്രീലങ്കൻ ലെജെൻഡ്സിന് ജയത്തുടക്കം. ഓസ്ട്രേലിയയെ ഏഴ് റൺസിലാണ് ലങ്ക തോൽപ്പിച്ചത്. ടോസ് നേടി ആദ്യം ബാറ്റ് ചെയ്ത ശ്രീലങ്ക എട്ട് വിക്കറ്റ് നഷ്ടത്തിൽ 161 റൺസെടുത്തു. 30 റൺസെടുത്ത റൊമേഷ് കലുവിതരണയാണ് ടോപ് സ്കോറര്‍. 

കപുഗദേര 28ഉം ഫര്‍വീസ് മഹ്റൂഫ് പുറത്താകാതെ 20ഉം റൺസെടുത്തു. ദിൽഷന് 18ഉം അട്ടപ്പട്ടുവിന് 14ഉം റൺസെടുക്കാനേ ആയുള്ളൂ… ഓസീസിന് വേണ്ടി ഡോഹട്രിയും ക്രെജ്സയും രണ്ട് വിക്കറ്റ് വീതം വീഴ്‌ത്തി. 162 റൺസ് വിജയലക്ഷ്യവുമായിറങ്ങിയ ഓസ്ട്രേലിയൻ ലെജെൻഡ്സിന്റെ ഇന്നിംഗ്സ് 19.5 ഓവറിൽ 154ൽ അവസാനിച്ചു. . 96 റൺസെടുത്ത നഥാൻ റേഡന് പിന്തുണ നൽകാൻ മറ്റ് താരങ്ങൾക്കായില്ല

. ബ്രാഡ് ഹോഡ്ജ് ഏഴും ഹാഡിൻ പത്തും റൺസെടുത്ത് പുറത്തായി. ഏഴ് ഓസീസ് താരങ്ങൾക്ക് രണ്ടക്കം കാണാനായില്ല. ലങ്കയ്‌ക്ക് വേണ്ടി ദിൽഷൻ മൂന്ന് വിക്കറ്റ് വീഴ്‌ത്തിയപ്പോൾ രെംഗന ഹെരാത്തും മെഹ്റൂഫും രണ്ട് വിക്കറ്റ് വീതം സ്വന്തമാക്കി. മൂന്ന് ഓവര്‍ എറിഞ്ഞ മുത്തയ്യ മുരളീധരന് വിക്കറ്റൊന്നും നേടാനായില്ല. ചൊവ്വാഴ്‌ച്ച മുംബൈ ഡിവൈ പാട്ടിൽ സ്റ്റേഡിയത്തിൽ ഇന്ത്യക്കെതിരെയാണ് ശ്രീലങ്കയുടെ അടുത്ത മത്സരം. 16ന് പൂനെയിൽ വെസ്റ്റ് ഇൻഡീസാണ് ഓസ്ട്രേലിയൻ ലെജെൻഡ്സിന്റെ അടുത്ത എതിരാളികൾ