ആലുവ: പൂര്ണമായും കാഴ്ചയില്ലാത്ത 11 വയസുകാരായ മനോജും, ഐബി.സി. തോമസും ഏറ്റവും ആഴവും ഒഴുക്കും കൂടിയ ഭാഗം കുറുകെ പെരിയാര് നീന്തിക്കടന്നു. നീന്തല് പരിശീലനം അടിസ്ഥാന വിദ്യാഭ്യാസത്തിന്റെ സിലബസിന്റെ ഭാഗമാക്കണമെന്ന ആഹ്വാനവുമായിട്ടാണ് നീന്തല് പരിശീലകന് സജി വളാശേരിയുടെ നേതൃത്വത്തില് ഇവര് നീന്തി കടന്നത്. ഇരുവരും കീഴ്മാട് അന്ധവിദ്യാലയത്തിലെ വിദ്യാര്ഥികളാണ്.
2018ലെ പ്രളയത്തില് ആലുവ വിറങ്ങലിച്ചപ്പോള് വീടുകളിലേക്ക് പോകാന് കഴിയാതിരുന്ന 30 കുട്ടികളുടെ മാതാപിതാക്കളുടെ ആശങ്കകളാണ് കാഴ്ചപരമിതരായ കുട്ടികളെ നീന്തല് പരിശീലിപ്പിക്കേണ്ടതിന്റെ ആവശ്യകത ബോധ്യമായതെന്ന് ഇവര്ക്കൊപ്പം പുഴയില് നീന്തി കടന്ന അധ്യാപിക ജിജി വര്ഗീസ് പറഞ്ഞു.
ആലുവ അദ്വൈതാശ്രമം കടവില്നിന്ന് മണപ്പുറത്തേക്കാണ് നീന്തിയത്. കീഴ്മാട് ഗ്രാമപഞ്ചായത്ത് പ്രസിഡന്റ്കെ.എ. രമേശ് ഫ്ളാഗ് ഓഫ് ചെയ്തു. ശിവരാത്രി മണപ്പുറത്ത് വിദ്യാഭ്യാസ സ്റ്റാന്റിംങ്ങ് കമ്മറ്റി ചെയര്മാന് അഭിലാഷ് അശോകന്, ആലുവ അന്ധവിദ്യാലയത്തിന്റെ മാനേജര് വര്ഗ്ഗീസ് അലക്സാണ്ടര്, കുട്ടികളും സഹപ്രവര്ത്തകരും ഇവരെ മണപ്പുറത്ത് സ്വീകരിച്ചു.
