ആലപ്പുഴ: അമ്പലപ്പുഴയിൽ രണ്ടാനച്ഛന്റെ ക്രൂരമർദ്ദനത്തിൽ മൂന്നു വാസുകാരന് ഗുരുതര പരിക്ക്. മർദ്ദനത്തിൽ ജനനേന്ദ്രിയത്തിലടക്കം സാരമായി പരിക്കേറ്റ കുട്ടിയെ ആലപ്പുഴ മെഡിക്കൽ കോളേജിലെ തീവ്രപരിചരണ വിഭാഗത്തിൽ പ്രവേശിച്ചു. പുതുവൽ സ്വദേശി വൈശാഖാണ് കുട്ടിയെ മർദ്ദിച്ചത്. ഇയാളെ പോലീസ് അറസ്റ്റ് ചെയ്തു.
രണ്ട് ദിവസം മുമ്പാണ് മർദ്ദനം നടന്നത്. നാട്ടുകാരാണ് വിവരം പോലീസിനെ അറിയിച്ചത്. നിരന്തരം വൈശാഖ് കുട്ടിയെ മർദ്ദിക്കാറുണ്ടെന്ന് പരിസരവാസികൾ പറഞ്ഞു. കുട്ടിയുടെ ദേഹമാസകലം അടികൊണ്ട് നീര് വന്നിട്ടുണ്ട്. മുഖത്തും അടിയേറ്റ പാടുകളുണ്ട്. കുട്ടിക്ക് നടക്കാനും ബുദ്ധിമുട്ടുണ്ട്. നാട്ടുകാരാണ് ആദ്യം വൈശാഖിനെ പിടികൂടിയത്. ഇവരിൽ ചിലർ മർദ്ദിച്ചതോടെ ഇയാൾ കടലിലേക്ക് ചാടി. തുടർന്ന് ഇയാളെ നാട്ടുകാർ തന്നെ കരയിലെത്തിച്ച് പോലീസിൽ ഏൽപ്പിക്കുകയായിരുന്നു.
വൈശാഖിന്റെ ഭാര്യയുടെ ആദ്യബന്ധത്തിലുള്ള ആൺകുട്ടി ആണ് മർദ്ദനത്തിനിരയായത്. അനുസരണക്കേട് കാട്ടിയതിനാണ് മർദ്ദിച്ചതെന്നാണ് അമ്മ പറയുന്നത്. കുട്ടിയുടെ ശാരീരിക അവസ്ഥ മോശമായതോടേ നാട്ടുകാരും വാർഡ് കൗൺസിലർ അടക്കമുള്ളവർ വീട്ടിലെത്തുകയായിരുന്നു.
