ആലപ്പുഴ: പൗരത്വ നിയമ ഭേദഗതിക്കെതിരെ എന്ന പേരില് നടക്കുന്ന സമരങ്ങളില് ഇസ്ലാമിക തീവ്രവാദ സംഘടനകള് നുഴഞ്ഞുകയറിയെന്ന ആരോപണം ശരിവച്ച് സമസ്ത.
സംഘടനയുടെ മുഖപത്രമായ സുപ്രഭാതത്തില് എസ്വൈഎസ് സംസ്ഥാന വര്ക്കിങ് സെക്രട്ടറി പിണങ്ങോട് അബൂബക്കര് എഴുതിയ ലേഖനം ഇക്കാര്യം സമ്മതിക്കുന്നു. പൗരത്വ നിയമത്തിനെതിരെ നടക്കുന്ന സമരങ്ങളില് എസ്ഡിപിഐയും, ജമാഅത്തെ ഇസ്ലാമി, വെല്ഫെയര് പാര്ട്ടികളും നുഴഞ്ഞു കയറി കളങ്കപ്പെടുത്തുന്നു എന്നാണ് അബൂബക്കറിന്റെ വിലാപം.
സമരങ്ങളില് നുഴഞ്ഞുകയറി അറപ്പുളവാക്കുന്ന മുദ്രാവാക്യങ്ങള് വിളിച്ച് ബഹുസ്വരതയുടെ സൗന്ദര്യം കളങ്കപ്പെടുത്താന് മത്സരിക്കുകയായിരുന്നു ഈ സംഘടനകളെന്ന് അദ്ദേഹം പരിതപിക്കുന്നു.
മുസ്ലിം സമൂഹത്തെ തെറ്റിദ്ധരിപ്പിക്കാനും ഒറ്റപ്പെടുത്താനും ഇരകളാക്കി പാകപ്പെടുത്തിക്കൊടുക്കാനും സഹായിക്കുകയായിരുന്നു ഇവര്. വാടക പ്രഭാഷകരെ വച്ച് തെരുവുകളില് നടത്തിയ പ്രസംഗങ്ങള് സാമുദായിക ഭദ്രത തകര്ക്കുന്നതിനാണ് ഉപയോഗപ്പെടുത്തിയത്. മതപരമായ സ്വത്വബോധത്തെ ആസ്പദമാക്കി രാഷ്ട്രീയരംഗത്ത് ഇറങ്ങുന്നവര് ജനസമൂഹങ്ങളുടെ സ്വത്വ ബഹുത്വത്തെ നിരാകരിക്കുന്നത് നൈതികത നിഷേധിക്കലാണ്. എല്ലാ മത വിഭാഗങ്ങള്ക്കും അവരുടേതായ സ്വത്വബോധമുണ്ട്. പരസ്പരം മാനിക്കാനും വിലമതിക്കാനും
മനസ്സുണ്ടാവണം. ഇത്തരം തീവ്ര സ്വത്വവാദ സംഘടനകള്ക്ക് സൃഷ്ടിപരമായി ബഹുസ്വര സമൂഹത്തില് ഇടംനേടാന് സാധിച്ചില്ല. മതനിരപേക്ഷ- ജനാധിപത്യ വിശ്വാസികളെ അണിനിരത്തിയ ജാഥകളും സമ്മേളനങ്ങളും അലങ്കോലപ്പെടുത്തി അപമാനിക്കാനാണ് ഇവര് സമയം കണ്ടെത്തിയത്. പോലീസ് വര്ഗീയത ശക്തി പ്രാപിക്കുകയാണെന്നും ‘കാക്കിക്കുള്ളിലെ കാവിയും സമരങ്ങളുടെ ഭാഷയും’ എന്ന ലേഖനം വിമര്ശിക്കുന്നു.
സമരങ്ങളില് തീവ്രവാദികള് നുഴഞ്ഞുകയറുന്നു എന്ന് നേരത്തേ മുഖ്യമന്ത്രി പിണറായി വിജയന് നിയമസഭയില് വെളിപ്പെടുത്തിയിരുന്നു. കോണ്ഗ്രസും, മുസ്ലിം ലീഗും പിണറായിക്കെതിരെ രംഗത്തെത്തിയിരുന്നു. പിന്നീട് സിപി
ഐയും പിണറായിയെ തള്ളിപ്പറഞ്ഞിരുന്നു. ഈ സാഹചര്യത്തിലാണ് സമരരംഗത്തുള്ള നേതാവിന്റെ വെളിപ്പെടുത്തല്.
