ന്യൂദല്ഹി: കൊറോണ വൈറസ് പടര്ന്നു പിടിച്ച ചൈനയിലെ വൂഹാനില് നിന്ന് മറ്റു സ്ഥലങ്ങളിലേക്ക് പോകാന് ഇന്ത്യക്കാരെ അനുവദിക്കണമെന്ന് ചൈനയോട് ഇന്ത്യ അഭ്യര്ഥിച്ചു. നഗരം അപ്പാടെ അടച്ചിരിക്കുന്നു. ഒരാളെ പോലും പുറത്തേക്ക് വിടുന്നുമില്ല. ഈ സാഹചര്യത്തിലാണ് ഇന്ത്യയുടെ അഭ്യര്ഥന.
ചൈനയില് കൊറോണ ബാധിച്ച് ഇതിനകം 41 പേര് മരിച്ചു. 1287 പേര്ക്ക് കൊറോണ ബാധ സ്ഥിരീകരിച്ചു. വൂഹാനില് മുന്നൂറോളം ഇന്ത്യക്കാരുണ്ട്. കുറേപേര് രോഗം പ്രത്യക്ഷപ്പെട്ട സമയത്ത് ഇവിടം വിട്ടിരുന്നു. ചിലര് ഇന്ത്യയില് മടങ്ങിയെത്തി. ഇവിടെ തുടരുന്ന ഇന്ത്യക്കാരുടെ സഹായത്തോടെയാണ് ഇവിടെയുള്ളവരുടെ പട്ടിക തയാറാക്കിയത്. ഇവിടെ തുടരുന്നവരില് കൂടുതലും വിദ്യാര്ഥികളാണ്. അന്പതിലേറെ ഉദ്യോഗസ്ഥരുമുണ്ട്. മിക്ക ഇന്ത്യന് കുടുംബങ്ങളും ചൈന വിട്ടു. നിയന്ത്രണം തുടര്ന്നാല് നിത്യോപയോഗ സാധനങ്ങള് പോലും കിട്ടാതാകുമെന്ന് ഇന്ത്യാക്കാര് ആശങ്കപ്പെടുന്നു. വൈറസ് വായുവിലൂടെ പകരുമെന്ന അഭ്യൂഹങ്ങളും ഭീതി വിതയ്ക്കുന്നു.
വൈറസ് മനുഷ്യരില് നിന്ന് മനുഷ്യരിലേക്ക് പകരുമെന്നതിനാല് ഇപ്പോള് ഇവിടെയുള്ളവര് എന്തു ചെയ്യണമെന്നറിയാതെ വിഷമത്തിലാണ്. രണ്ട് ഹോട്ട്ലൈനുകള് ഇന്ത്യന് എംബസി തുറന്നിട്ടുണ്ട്. അതിലേക്ക് വിളികളുടെ ഒഴുക്കാണ്. ഇവിടെ ഇപ്പോഴുള്ളവരുടെ എണ്ണം കുറവായതിനാല് വേഗത്തില് പരസ്പരവും എംബസിയുമായും ബന്ധപ്പെടാന് കഴിയുന്നുണ്ട്. പുറത്തു പോകാന് അനുവദിച്ചാല് പോലും പോകുക എളുപ്പമല്ല. ബസുകളും ട്രെയിനുകളും ഓടുന്നില്ല.
