ന്യൂദല്ഹി : രാജ്യം 71ാം റിപ്പബ്ലിക് ദിനാഘോഷത്തില്. രാജ്പഥില് നിന്നും ഒമ്പത് മണിയോടെ റിപ്പബ്ലിക് ദിനാഘോഷങ്ങള്ക്ക് തുടക്കമിട്ടു. ഇന്ത്യയുടെ മുഖ്യാതിഥിയായി ബസീല് പ്രസിഡന്റായ ജെയ്ര് ബോള്സൊനാരോ എത്തിക്കഴിഞ്ഞിട്ടുണ്ട്. ദേശീയ യുദ്ധസ്മാരകത്തില് വീരസൈനികര്ക്ക് പ്രധാനമന്ത്രി ആദരാഞ്ജലികള് അര്പ്പിക്കുന്നതോടെയാണ് 71-ാം റിപ്പബ്ലിക് ദിനാഘോഷ ചടങ്ങുകള്ക്ക് തുടക്കമാവുക.
ഇത് മൂന്നാം തവണയാണ് ഒരു ബ്രസീലിയന് പ്രസിഡന്റ് റിപ്പബ്ലിക് ദിനത്തില് വിശിഷ്ടാതിഥി ആയി എത്തുന്നത്. ഇതിന് മുമ്പ് 1996, 2004 എന്നീ വര്ഷങ്ങളിലും ബ്രസീലിയന് പ്രസിഡന്റുമാര്ക്ക് ഇന്ത്യന് റിപ്പബ്ലിക് ദിനത്തില് അതിഥിയായി എത്തിയിട്ടുണ്ട്.
വിവധ കലാസംസ്കാരിക പരിപാടികളോടെയാണ് രാജ്യം റിപ്പബ്ലിക് ദിനം ആഘോഷിക്കുന്നത്. സൈന്യത്തിന്റെ ശക്തിയും വൈദഗ്ധ്യവും വിളിച്ചോതുന്ന അഭ്യാസ പ്രകടനങ്ങളും ഇതോടൊപ്പം സംഘടിപ്പിച്ചിട്ടുണ്ട്.
90 മിനിട്ട് നീണ്ടുനില്ക്കുന്ന പരേഡ് ഇത്തവണ ലെഫ്. ജനറല് അസിത് മിസ്ത്രി നയിക്കും. സൈനിക കരുത്ത് അറിയിക്കുന്നവയായിരിക്കും പ്രകടനങ്ങള്. വായുസേനയുടെ പുതിയ ചിന്നുക്ക്, അപ്പാച്ചെ ഹെലികോപ്ടറുകള് ഒരുക്കുന്ന ആകാശ കാഴ്ചകളും ഉണ്ടാകും. കൂടാതെ സാംസ്കാരിക വൈവിധ്യങ്ങളുമായി വിവിധ സംസ്ഥാനങ്ങളുടെ ഫ്ളോട്ടുകളും രാജ്പഥിലൂടെ കടന്നുപോകും.
പൗരത്വ നിയമ ഭേദഗതിക്കെതിരെയുള്ള പ്രതിഷേധങ്ങള് തുടരുന്നതിനാല് സൈന്യത്തിന്റെ കനത്ത സുരക്ഷാവലയത്തിലാകും ചടങ്ങുകള് നടക്കുക. കേന്ദ്ര സുരക്ഷാ സേനയുടെ 48 കമ്പനികളെ ദല്ഹിയില് വിന്യസിച്ചിരിക്കുകയാണ്.
ഇന്ന് വൈകീട്ട് ആറ് മണിയോടെ പ്രധാനമന്ത്രി നരേന്ദ്രമോദി മന് കി ബാത്തിലൂടെ ജനങ്ങളെ അബിസംബോധന ചെയ്ത് സംസാരിക്കും. അതേസമയം ആശയപരമായ എതിര്പ്പുകള് അക്രമത്തിന്റെ പാതയിലേക്ക് പോകരുതെന്നായിരുന്നു റിപ്പബ്ലിക് ദിനത്തില് രാഷ്ട്രപതി രാംനാഥ് കേവിന്ദിന്റെ സന്ദേശം. ശനിയാഴ്ച രാജ്യത്തെ അഭിസംബോധന ചെയ്ത് സംസാരിക്കവേയാണ് ഇക്കാര്യം അറിയിച്ചത്.
