ന്യൂദല്ഹി: മുന് കേന്ദ്രമ്രന്തിമാരും പൊതുപ്രവര്ത്തകരുമായിരുന്ന അന്തരിച്ച മുന് കേന്ദ്രമന്ത്രിമാര് ജോര്ജ്ജ് ഫെര്ണാണ്ടസ്, അരുണ് ജെയ്റ്റ്ലി, സുഷമ സ്വരാജ്, ഉഡുപ്പി പേജാവര് മഠാധിപതിയായിരുന്ന സ്വാമി വിശ്വേശ തീര്ഥ, ബോക്സര് മേരികോം, മൗറീഷ്യസ് പ്രസിഡന്റായിരുന്ന അനിരുദ്ധ ജഗന്നാഥ്, എന്നിവര്ക്ക് പദ്മ വിഭൂഷണ്.
പ്രശസ്ത ആധ്യാത്മികാചാര്യനും മലയാളിയുമായ ശ്രീ എം (മുംതാസ് അലി), പ്രമുഖ നിയമജ്ഞനായിരുന്ന ഡോ.എന്.ആര്. മാധവ മേനോന് എന്നിവര്ക്ക് പദ്മഭൂഷണും സാമൂഹ്യപ്രവര്ത്തകനും ഹരിജന് സമാജം അധ്യക്ഷനുമായ പെരുമ്പാവൂര് കുറുപ്പംപടി സ്വദേശി എം.കെ. കുഞ്ഞോല്, കോട്ടയം മോനിപ്പള്ളി സ്വദേശിനിയും പരമ്പരാഗത കലാരൂപമായ നോക്കുവിദ്യാ പാവകളിയുടെ പരിരക്ഷകയുമായ മൂഴിക്കല് പങ്കജാക്ഷി, ഹോര്ത്തൂസ് മലബാറിക്കൂസ് മലയാളത്തില് വ്യാഖ്യാനിച്ച പ്രമുഖ സസ്യശാസ്ത്രജ്ഞന് പ്രൊഫ.കെ.എസ്. മണിലാല്, ഹിന്ദി ഭാഷാ പണ്ഡിതനും കലകാരനുമായ എന്. ചന്ദ്രശേഖരന് നായര്, അരുണാചല് പ്രദേശില് സാമൂഹ്യ സേവനം നടത്തുന്ന മലയാളിയായ സത്യനാരായണന് മുണ്ടയൂര് എന്നിവര്ക്ക് പദ്മശ്രീയും ലഭിച്ചു. റിപ്പബ്ലിക് ദിനത്തോടനുബന്ധിച്ച് 16 പേര്ക്ക് പദ്മഭൂഷണും, 117 പേര്ക്ക് പദ്മശ്രീയുമാണ് പ്രഖ്യാപിച്ചത്.
മുന് കേന്ദ്രമന്ത്രിയും ഗോവ മുഖ്യമന്ത്രിയുമായിരുന്ന മനോഹര് പരീക്കര്, ബാഡ്മിന്റണ് താരം പി.വി. സിന്ധു, ബംഗ്ലാദേശില് നിന്നുള്ള പൊതുപ്രവര്ത്തകന് പരേതനായ സെയ്ദ് മുസാസീം അലിം എന്നിവരും പദ്മഭൂഷന് ലഭിച്ചവരില് പെടുന്നു.
അന്യം നില്ക്കാറായ നോക്കുവിദ്യാ പാവകളി സംരക്ഷണവും പ്രചാരണവും ജീവിതവ്രതമാക്കിയ പങ്കജാക്ഷി എട്ടാം വയസ് മുതല് ഈ കലയെ ഉപാസിക്കുന്നു. കേരളത്തിലും ലോകത്തിന്റെ പലഭാഗങ്ങളിലും ഇതിനകം നോക്കുവിദ്യാ പാവകളി അവതരിപ്പിച്ചു. അരുണാചലിലെ ഗ്രാമങ്ങളില് വിദ്യാഭ്യാസവും വായനയും പ്രചരിപ്പിക്കുന്നതില് നിര്ണായക പങ്കു വഹിച്ച മുണ്ടയൂര് സത്യനാരായണന് എന്ന അങ്കിള്മൂസ ഭവന വായനശാലകള് എന്ന ആശയത്തിന്റെ പ്രണേതാവാണ്. ഉള്നാടന് ഗ്രാമങ്ങളില് മുളയില് തീര്ത്ത പതിമൂന്ന് വായനശാലകള് അദ്ദേഹം സ്ഥാപിച്ചു. പതിനായിരത്തിലേറെ പുസ്തകങ്ങളാണ് ഓരോ വായനശാലയിലുമുള്ളത്. മുബൈയില് റവന്യൂ ഓഫീസറായിരുന്ന സത്യനാരായണന് ഇതുപേക്ഷിച്ചാണ് 1979ല് അരുണാചലലില് വിവേകാനന്ദ സേവാകേന്ദ്രത്തിന്റെ മുഴുവന്സമയ പ്രവര്ത്തകനായത്.
കാല്നൂറ്റാണ്ടായി ഫൈസാബാദില് അനാഥ ജഡങ്ങള് സംസ്ക്കരിക്കുന്ന ചാച്ചാ ഷെരീഫ് എന്ന മുഹമ്മദ് ഷെരീഫ്, നൂറുകണക്കിന് പാവപ്പെട്ട രോഗികള്ക്ക് നിത്യേന സൗജന്യഭക്ഷണം നല്കുന്ന ലങ്കാര് ബാബയെന്ന ജഗദീഷ് ലാല് അഹൂജ, കര്ണ്ണാടകത്തിലെ ഗ്രാമീണ പരിസ്ഥിതി പ്രവര്ത്തക, വനവിജ്ഞാന കോശമെന്ന് വിളിക്കുന്ന തുളിസി ഗൗഡ, ഭോപ്പാല് വാതകദുരന്തത്തിന്റെ ഇരകള്ക്ക് വേണ്ടി വര്ഷങ്ങളോളം നിരന്തരം ശബ്ദമുയര്ത്തിയിരുന്ന പരേതനായ അബ്ദുള് ജബ്ബാര്, ഏഷ്യന് ആനകളുടെ സംരക്ഷണത്തിനു വേണ്ടി പോരാടുന്ന ആസാമിലെ കുശാല് കണ്വാര് ശര്മ്മ, മഹാരാഷ്ട്രയിലെ നിരക്ഷരയായ വനവാസി കര്ഷക രാഖിബായി സോമാ പോപ്രെ എന്നിവര്ക്കടക്കമാണ് പദ്മശ്രീ.
