ന്യൂദല്ഹി: 2020-21 സാമ്പത്തിക വര്ഷത്തെ കേന്ദ്ര ബജറ്റിന്റെ മുന്നൊരുക്കങ്ങളുടെ ഭാഗമായി നടത്തുന്ന ഹല്വ സെറിമണി ചടങ്ങ് നടന്നു. പാര്ലമെന്റ് നോര്ത്ത് ബ്ലോക്കിലായിരുന്നു ചടങ്ങ്. ബജറ്റ് രേഖകളുടെ അച്ചടി തുടങ്ങുന്നതുമായി ബന്ധപ്പെട്ടാണ് ഈ ചടങ്ങ് നടക്കാറുള്ളത്. ഉദ്യോഗസ്ഥര്ക്ക് ഹല്വ പാചകം ചെയ്ത് വിതരണം ചെയ്യുന്നതാണ് ചടങ്ങ്. ഫെബ്രുവരി ഒന്നിന് രാവിലെ 11 മണിക്കാണ് ധനമന്ത്രി നിര്മല സീതാരാമന് ബജറ്റ് അവതരിപ്പിക്കുക.
കേന്ദ്ര ബജറ്റിന്റെ അതീവ രഹസ്യസ്വഭാവം സൂക്ഷിക്കുന്നതിന്റെ ഭാഗമായാണ് ധനകാര്യമന്ത്രാലയത്തില് എല്ലാ ബജറ്റിനു മുമ്പും ഹല്വ സെറിമണി നടത്തുന്നത്. ഹല്വ വിതരണത്തിനു ശേഷം മന്ത്രാലയത്തിലെ മിക്ക ഉദ്യോഗസ്ഥരും മുഴുവന് സമയവും ബജറ്റുമായി ബന്ധപ്പെട്ട ജോലികളിലാവും. ചില മുതിര്ന്ന ഉദ്യോഗസ്ഥര്ക്കൊഴികെ മറ്റാര്ക്കും ഈ ദിവസങ്ങളില് വീട്ടില് പോകാനോ ബന്ധുക്കളുമായി ഫോണിലോ ഇമെയില് പോലുള്ള മറ്റ് ആശയവിനിമയത്തിലൂടെയോ ബന്ധപ്പെടാന് പോലും അനുവാദമുണ്ടാകില്ല. ബജറ്റ് തയാറാക്കല് പ്രക്രിയയുടെ ഭാഗമായ ഓരോ ജീവനക്കാരെയും ചടങ്ങില് അംഗീകരിക്കുകയും അഭിനന്ദിക്കുകയും ചെയ്യും. ബജറ്റ് അവതരണം വരെ മന്ത്രാലയത്തില് ഈ നിയന്ത്രണം തുടരും.
