ശ്രീനഗര്: ജമ്മു കശ്മീരിലെ ജനങ്ങളെ വിശ്വാസത്തിലെടുത്ത്, കേന്ദ്ര സര്ക്കാര് നടപ്പാക്കുന്ന വികസന പദ്ധതികള് ജനങ്ങളിലേക്കെത്തിക്കാന് കേന്ദ്രമന്ത്രിമാര് നടത്തുന്ന ജമ്മു കശ്മീര് സന്ദര്ശനം തുടരുന്നു. സ്മൃതി ഇറാനി, പീയുഷ് ഗോയല്, മഹേന്ദ്ര നാഥ് പാണ്ഡെ, അര്ജുന് റാം മേഘ്വാള്, വി. മുരളീധരന്, അനുരാഗ് സിങ് ഠാക്കൂര്, ഡോ. ജിതേന്ദ്ര സിങ്, അശ്വനി ചൗബെ, ആര്.കെ. സിങ് എന്നിവരാണ് ഇന്നലെ കശ്മീരില് വിവിധയിടങ്ങളില് പരിപാടികളില് പങ്കെടുത്തത്. മന്ത്രിമാര്ക്ക് വന് സ്വീകരണമാണ് കാശ്മീര് ജനത നല്കിയത്.
കത്വ, പാന്തല്, ദന്സല്, ബസോലി,ബില്വാര്, നഗ്രോത, ഉധംപൂര്, അക്നോര്, ഗഗ്വാള്, ഖേലാനി തുടങ്ങിയ സ്ഥലങ്ങളാണ് പ്രധാനമായും മന്ത്രിമാര് സന്ദര്ശിച്ചത്. ഇവര് ജനങ്ങളുമായി ആശയ വിനിമയം നടത്തി. പുതിയ നിരവധി പദ്ധതികള്ക്കും മന്ത്രിമാര് തുടക്കം കുറിച്ചു. പൂര്ത്തിയാക്കിയ നിരവധി പദ്ധതികള് ഇതോടൊപ്പം ജനങ്ങള്ക്ക് സമര്പ്പിച്ചു. തദ്ദേശ സ്ഥാപനങ്ങളിലെ ജനപ്രതിനിധികള് ഉള്പ്പെടെയുള്ളവരുമായി മന്ത്രിമാര് ആശയവിനിമയം നടത്തി.
ഒരോ പ്രദേശത്തെയും പ്രാദേശിക വികസന പ്രശ്നങ്ങളും ചര്ച്ചയായി. കശ്മീരില്ലുണ്ടാകാന് പോകുന്ന വ്യാവസായിക, ടൂറിസം നിക്ഷേപങ്ങളെക്കുറിച്ചും, തൊഴില്, വരുമാന വര്ധനവിനെക്കുറിച്ചും ജനങ്ങളെ ബോധ്യപ്പെടുത്താനും മന്ത്രിമാര്ക്കായി. കശ്മീര് എന്നും തങ്ങളുടെ ഹൃദയത്തോട് ചേര്ന്നിരിക്കുന്നതാണെന്നും ഇനിയും അങ്ങനെ തന്നെ തുടരുമെന്നും മന്ത്രിമാര് പറഞ്ഞു. പ്രധാനമന്ത്രി നരേന്ദ്ര മോദിയുടെ നേതൃത്വത്തില് കശ്മീര് എത്രയും വേഗം സമാധാനം കൈവരിക്കുമെന്നും തുടര്ന്ന് വികസനത്തിന്റെയും നേട്ടങ്ങളുടെയും നാളുകളായിരിക്കുമെന്നും മന്ത്രിമാര് പ്രകടിപ്പിച്ചു. ഇന്ന് നാലു മന്ത്രിമാരാണ് കശ്മീരിലുള്ളത്.
