തിരുവനന്തപുരം: ദക്ഷിണേന്ത്യയില് തുടര് ഭീകരാക്രമണത്തിന് സാധ്യതയുണ്ടെന്ന് തമിഴ്നാട് ക്യൂ ബ്രാഞ്ചിന്റെ മുന്നറിയിപ്പ്. കളിയിക്കാവിളയില് പോലീസ് ഉദ്യോഗസ്ഥനെ വധിച്ചതില് സൂത്രധാരന് അടക്കമുള്ള പ്രതികള് പിടിയിലായ സാഹചര്യത്തിലാണ് ക്യൂ ബ്രാഞ്ചിന്റെ ഗൗരവകരമായ മുന്നറിയിപ്പ്. പ്രധാന കണ്ണികള് പിടിയിലായ സാഹചര്യത്തില് സമാനരീതിയില് ഇനിയും ആക്രമങ്ങള്ക്ക് സാധ്യതയുണ്ടെന്നും അതിനാല് ദക്ഷിണേന്ത്യയില് കൂടുതല് ജാഗ്രതപാലിക്കണം എന്നുമാണ് ക്യൂ നിര്ദ്ദേശം.
ഭീകര സംഘത്തിലെ അംഗങ്ങള് പിടിയിലായ സാഹചര്യത്തില് ഭീകര ഗ്രൂപ്പിലെ മറ്റു അംഗങ്ങള് ആക്രമണങ്ങള് നടത്തി പോലീസ് സംവിധാനത്തിനെ പ്രതിരോധത്തിലാക്കാന് ശ്രമിക്കും എന്നണ് ക്യൂ ബ്രാഞ്ചിന്റെ നിഗമനം. ഭീകര ഗ്രൂപ്പിലെ കൂടുതല് അംഗങ്ങളെ കണ്ടെത്താന് അന്വേഷണ സംഘത്തിന് സാധിച്ചിട്ടില്ല. എന്നാല് സംഘടനയുടെ സംഘടന സംവിധാനം മനസ്സിലാക്കാന് സംഘത്തിന് കഴിഞ്ഞിട്ടുണ്ട്.
കളിയിക്കാവിളയില് പോലീസ് ഉദ്യോഗസ്ഥനെ വധിക്കാനായി കേരളത്തില് നിന്ന് പോയതും കൃത്യം നടത്തിയ ശേഷം ഭീകരര് കേരളത്തില് എത്തി എന്നതുമായ അന്വേഷണ സംഘത്തിന്റെ കണ്ടുപിടുത്തം കേരളത്തിലെ സംഘടനയുടെ അടിവേരുകള് വ്യക്തമാക്കുന്നതാണ്. അല്-ഉമ്മക്ക കേരളത്തില് മിക്ക ജില്ലകളിലും ഒളിത്താവളങ്ങളും സംഘടനാ സംവിധാനവും പ്രവര്ത്തിക്കുന്നു എന്നും അന്വേഷണ സംഘം വ്യക്തമാക്കിയിരുന്നു. കേരളം കൂടാതെ തമിഴ്നാടിന്റെ തെക്കന് ജില്ലകളിലും ബംഗളൂരുവിലും ഭീകര സംഘടനക്കുള്ള സ്വാധീനം തെളിഞ്ഞിട്ടുണ്ട്. വരും ദിവസങ്ങളില് സംഘത്തിലെ കൂടുതല് പേരെ പിടികൂടാനാണ് ക്യൂ ബ്രാഞ്ച് ശ്രമിക്കുന്നത്. അധികം വൈകാതെ അന്വേഷണം എന്ഐഎ ഏറ്റെടുക്കും.
